Universidade Nacional Timor Lorosa'e (UNTL) liuhusi Faculdade de Turismo Arte, Indústrias Criativas e Culturais (FTAICC) nia dekanu Feliciano Quintas do Ceu ho embaixador Japaun iha Timor-Leste Sr. Kimura abertura Semináriu kona-ba “Koor Tais”, iha salaun FTAICC UNTL nian (11/10).
Dekanu FTAICC nian Feliciano Quintas do Ceu hatete, semináriu ne’e parte ida para atu fahe informasaun no sosializasaun kona-ba kor natural husi NGO RELOKA promove hela nune’e futuru bele kontribui ba orijinalidade tais nian.
“Ohin NGO RELOKA no Embaxadór Japaun konvida peritu ne’ebé atu promove kona-ba kor tais ne’e mai iha fakuldade hodi partilla koñesimentu, nune’e ita bele kontinua promove no konserva, tanba fakuldade ida-ne’e nia natureza kona-ba turismu entaun tais ita-nia eransa kulturais faz parte ida ba turismu nomós oinsa aumenta estudante sira -nia konesimentu”, dehan dekanu.
Iha fatin hanesan Embaixador Japaun nian iha Timor-Leste Sr. Kimura hatete, sente ksolok tebes hodi marka presensa iha semináriu ida ne’e.
“Ha’u senti kontenti tebes tanba RELOKA apoiu dadaun inan feton sira iha Timor-Leste hodi halo kor ba tais indigo nian, agradese tebes ba RELOKA tanba lori oradór sira husi Japaun mai fahe tékniku kona-ba kor indigo nian.
Espera katak ho koperasaun ba produsaun tais sei klean liutan entre pais rua-ne’e, tanba estudante sira nu’udar futuru lideransa Timor-Leste nian no sira sei diskuti klean kona-ba turismu, kultura no agrikultura ho troka hanoin ne’ebé espesifika ba tékniku kresimentu ekonómiku liuhusi semináriu ida-ne’e,” dehan Embaixador.
Estudante Teresa Guterres hatete, liuhusi semináriu ne’e sira hetan koñesimentu oinsa uza kor husi natureza sira ba iha tais no roupa sira.
“Semináriu ne’e importante tebes, nune’e ita bele implementa fali hodi halo tais no roupa sira, liuhusi transforma kor natureza nian hodi hetan kor indigo ka kor azul.
Husu ba universidade atu bele mellora kooperasaun liuliu fundasaun Japaun nian iha Timor-Leste RELOKA, nune’e ami bele aprende no aplika kor indigo ba ita-nia sosiedade oinsa aproveita natureza hodi halo produsaun ba kor nian,”dehan estudante.
Semináriu ne’e realiza tanba servisu hamutuk entre FTAIC ho RELOKA hodi konvida orador husi Japaun nian Chitose Yamaguchi partilla kona-ba kultura Indigo iha Japaun no fundadora RELOKA Hilly Bouwman ho nia ekipa partilla kona-ba papel indigo iha kultura atual Timor-Leste nian no oinsa atu aplika iha Timor-Leste.
Média UNTL 
: Altur Ramos
: Altur RamosFoto 
: Altur Ramos no Roberta Perreira (estajiára)
: Altur Ramos no Roberta Perreira (estajiára)