Universidade Nacional Timor-Lorosa’e (UNTL) nia Diresaun Nacional Rekursu Umanu (DNRH), fasilita formasaun jurídika ba funsionariu ho kargu xefia sira ho tema “Hasa’e Koñesimentu Legal no Abilidade Prosedurál ba Funsionáriu UNTL nian” durante loron haat iha Auditóriu FCS Kaikoli, Díli (08/10).
Iha diskursu Diretór Nacional Rekursu Umanu Dr. Câncio Monteiro hateten, formasaun refere importante ba funsionáriu hotu, liu-liu kargu diresaun no xefia sira atu iha koñesimentu iha área jurídika.
“Durante ne’e parte rekursu umanu observa katak, liu-liu kargu xefia sira sempre simu orientasaun husi superiór atu ezekuta no halo pareser tékniku balu, tanba ne’e asuntu ida-ne’e atu foka liuba parte jurídika nian, atu fó hanoin no gia ita hodi hala’o ita-nia dezempeñu servisu hodi atinji mehi sira sai hanesan Sentru Exelénsia Ensinu Superior Iha Timor-Leste”, dehan Diretór Monteiro.
Diretór ne’e dehan, lori Universidade liu-liu Visereitór ba Asuntu Finansa no Administradór Jeral UNTL nia naran hakarak enkoraja ita hotu atu partisipa másimu iha formasaun nune’e bele gaña esperiénsia foun.
Iha fatin hanesan partisipante no atual Diretora Nasional Lojístika no Manutensaun sra. Fátima Odete da Cruz Monteiro agradese ba asesór prinsipal husi Komisaun Funsaun Públika (CFP) ne’ebé bele fahe ona nia esperiénsia iha universidade ba kargu xefia sira.
“Formasaun ida-ne’e di’ak tebes, tanba iha buat balu ne’ebé presiza partilla informasaun iha área jurídiku nian mai iha diresaun xefia sira hotu, nune’e iha lakunas balu karik bele aplika tuir buat ne’ebé ohin hetan iha formasaun ne’e bazeia ba lei”, dehan Diretora.
Diretora ne’e mós husu ba xefia sira bainhira halo desizaun ruma la bele sees husi koridor ne’ebé iha, halo jestaun no kontrolu nune’e bele lidera diresaun no deprtamentu sira ho di’ak hodi asegura Universidade di’ak liu iha futuru. Husu mós ba rekursu umanu atu kontinua formasaun sira hanesan ne’e hodi konvida formador sira seluk.
Formasaun jurídiku ne’e organiza husi Diresaun Nacional Rekursu Umanu no Formadór mai husi Funsaun Publika hanesan Asesor Jurídiku Prinsipál.
Média UNTL 
: Domingos Amaral
: Domingos AmaralFoto 
: Denilson Amandio Barros
: Denilson Amandio Barros