Universidade Nacional Timor Lorosa'e (UNTL), Faculdade de Direito (FADIR) nia Profesór Paulino do Carmo partilla koñesimentu kona-ba Poder Polítiku no Obrigasaun Konstitusionál ba estudante sira liuhusi semináriu ho tema “O direito é a Força que Harmoniza à Sociedade”, iha Kampus Sentrál UNTL, Díli 04/10.
Dekanu FADIR Profesór José Tomas Alves hatete, semináriu refere atividade estrakurikulár ne’ebé Asosiasaun Estudantíl mak realiza tuir tinan akademika atu eleva di’ak liu tan estudante sira-nia koñesimentu aleinde teoria nomós prátika.
“Ohin ne’e atividade nível asosiasun mak realiza, ita konvida orador sira bele husi parte Akadémika, Polítika no Sosiedade Sivíl sira ne’ebé iha koñesimentu hodi mai fahe sira-nia esperiénsia ba estudante sira.
Liuhusi seminariu ida-ne’e aliende matéria ne’ebé estudante sira hetan ona iha aula, maibé liuhusi atividade estrakurrikulár ne’e sira bele hetan tan matéria ida komplementar husi ema espesialista sira área konstitusionál nian”, dehan dekanu.
Iha fatin hanesan Profesór Paulino do Carmo nu’udar oradór hateten, Poder Polítiku no Diretu Konstitusional signifika ema ida asume kargu polítiku iha ninia ezersisu no lala’ok servisu ne’e nia tenki respeita ba obrigasaun ne’ebé hatur ona iha konstituisaun.
“Ohin ha’u dehan, poder polítiku nia ezersisiu ne’e ita tenki koloka povu ne’e nu’udar sentru. Maibé kuandu ita-nia vontade no interese aas liu entaun ita uza kualker meiu para alkansa ita-nia interese, ida-ne’e mak kria desviu, deskualidade, korrupsaun, koluzaun, neopotismu, buat sira-ne’e akontese, tanba ita ignora tiha obrigasaun ne’ebé hatur iha konstituisaun”, hateten Paulino.
Estudante Flaviana Mato de Araújo hatete, atividade refere importante tebes, tanba tópiku mak poder polítiku no obrigasaun kontituisional interesante tebes.
“Ami prezisa aprende barak liutan kona-ba materia ida-ne’e husi oradór sira hodi esplika klean liu tan mai ami, katak poder sidadaun nian bo’ot liu no povu nu’udar sentru atu dezenvolve nasaun ida ne’e, nune’e ami senti aumenta ami-nia koñesimentu ho atividade sira hanesan ne’e”, dehan Flaviana.
Média UNTL 
: Altur Ramos
: Altur RamosFoto 
: Altur Ramos
: Altur Ramos