Universidade Nacional Timor Lorosa’e (UNTL) Faculdade Educação Artes e Humanidade (FEAH), liuhusi Departmento de Língua Tetum (DLP) no Departamento de Língua Portuguesa (DLP) lansa Revista Akadémiku Online “Dadolin: Linguas e Literaturas”, iha Resintu Kampus Liceu, Díli (01/10).
Iha Diskursu Visereitór ba Asuntu Akadémika no Garantia Kualidade hatete, lori UNTL nia naran agradese ba parte hotu nia esforsu hodi lansa Jornál Akadémiku ne’ebé sai Produtu Sientífiku ba departamentu rua nian.
“Ha’u hakarak kongratula no agradese ba esforsu ne’e ho inisiativa ne’ebé halo hodi kria revista sientífika ho naran Dadolin ne’ebé foka liuba língua no literatura.
Ida-ne’e la’ós buat ida ne’ebé fasil maibé serbisu ho kuidadu tebes, ohin ita sente prezensa revista Dadolin ne’ebé sai hanesan produtu Sientífiku husi Departamentu rua ne’e nian”, hateten Visereitór Sousa.
Ministra Conselheira da Embaxada do Brasil, Sra. Rita Marques hatete, ho Revista Akadémika ne’e UNTL bele avansa liutan no sai hanesan ai-riin koñesementu nian iha área Lian no Literatura.
“Avansa liutan dalan maturidade akadémika hosi UNTL, ita laiha dúvida kona-ba importánsia hosi revista ba Faculdade Educação Artes e Humanidades, aliende ne’e nia mós sai hanesan ai-riin koñesimentu nian ba lian no literatura portugés no tetun. Revista ne’e sei sai hanesan kanál importante ida ba matenek-na'in sira atu fahe entre sira ho sira no ba públiku ne'ebé iha interese ba sira nia investigasaun atu asesu” hatete, Ministra Conselleiro Embaixada Brazil iha Timor-Leste.
Diretór DLT Prof. Duarte Leite Billy hateten, prezensa revista hanesan parte pozitivu ida atu responde ba ezijénsia husi ANAAA (Agência Nacional para Avaliaçãoe Acreditação Adamémica) nomós baze ba produtu sientífiku sira.
“Prezensa revista Dadolin iha departamentu rua hanesan parte ida hodi responde ba ezijénsia, ANAAA, nune’e mós baze ba konsolidasaun peskiza no produtu sientífiku husi profesór sira. Tanba ne’e ami agradese ba Profesora Erica no Profesór Vicente Paulino ne’ebé inisia ideia kriasaun revista Dadolin ida-ne’e no ba serbisu makaas ne’ebé profisionál sira halo ba edisaun dahuluk ne’ebé susesu”, tenik Profesór.
Revista Akadémika Online ne’e hanesan baze ida ba produtu sientífiku husi DEL no DEP atu bele públika artigu sientífiku sira. Enkuantu atividade refere hetan apoiu husi Embaxada Brazil iha Timor-Leste no Leitorado Guimarães Rosa UNTL, Fakuldade Educação Arte e Humanidades, Profesór Vicente Paulino no parte relevante sira.
Média UNTL 
: Jaimito Caldas (estajiáriu)
: Jaimito Caldas (estajiáriu)Foto 
: Agostinho da Cruz
: Agostinho da Cruz