Universidade Nacional Timor Lorosa’e (UNTL) nia Diresaun Nasional Reseitas (DNR) servisu hamutuk ho ekipa husi Gabinete Apoiu Auditória Interna akompaña husi Vise-dekanu asuntu administrsaun no finansa FCS nian halo inspesaun ba kantina ne’ebé lokaliza iha Kampus Kaikoli nian, Díli (4/07).
Tuir Diretór DNR nian, Sr. Mateus Amaral hatete, atividade ne’e hanesan ezekusaun lelaun ba material sira ne’ebé iha kantina FCS nian, ne’ebé antes ne’e jere husi kompañia Cadfer Café & Resto Unipesoal.Lda no la kumpre ona notifikasaun ne’ebé fó husi UNTL.
‘’Kompañia ne’e Asina kontratu ho UNTL hahú husi 2023-2025, maibé bainhira sira-nia funsionamentu la’o kompañia hasoru dezafiu iha finanseiru no sira la konsege halo pagamentu ba arendamentu no la kumpre tuir kontratu ne’ebé iha, nune’e ita halo notifikasaun ba kompañia ne’e durante loron 90 ona, maibé sira laiha resposta mak ohin ita halo sita ba materiál sira iha kantina ne’e rasik’’, dehan Diretór DNR.
Sr. Mateus hatutan, tuir prazu durante loron 90 mak empreza la fó resposta mak UNTL sei foti materiál sira hotu iha kantina nu’udar indemnizasaun ba prezuizu ne’ebé iha.
‘’Materiál sira ne’ebé mak ohin ita sita ona ba oin sei sai ona hanesan UNTL nian no ita mos sei halo aprosimasaun ho FCS atu bele loke fali konkursu ba públiku, nune’e ema hotu bele kompete atu bele prienxe fila fali ba kantina ne’e iha tempu badak’’, dehan Diretór.
Média UNTL
: Laurindo da Cruz & Eugenia de Jesus
: Laurindo da Cruz & Eugenia de JesusFoto
: Domingos dos Amaral
: Domingos dos Amaral