Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D, hamutuk ho Embaxadór Japão iha Timor-Leste, Tetsuya Kimura, no Osaka Gas Fundation entrega bolsa ba estudante hamutuk tolunulu (30) husi Faculdade de Engenharia Ciência e Tecnologia, iha Auditóriu FECT-Hera, Díli (25/04).
Relasiona ho asuntu refere, liuhusi entrevista Proreitór ba Asuntu Kooperasaun, Profesór Tomé Xavier Jerónimo, hateten estudante hirak ne’ebé hetan sertifikadu ne’e, tanbá sira selesionadu ba bolsa husi Osaka Gas Fundation ho valor ne’ebé di’ak.
“Kompaña Osaka Gas oferese bolsu estudu ba bolseiru sira ne’e liuhusi prosesu naruk ida hanesan identifika estudante sira ne’ebé ho valor di’ak, mak bele hetan bolsa no ohin entrega sertifikadu ba bolseiru sira", dehan Proreitór.
Iha diskursu Embaxador Japão nian iha Timor-Leste, Tetsuya Kimura, sente kontenti bele distribui bolsa ne'e no hato'o nia parabéns ba estudante bolseiru sira.
“Parabéns ba estudante bolseiru sira hotu ne'ebé admitidu iha bolsa ba tinan 2024 ne’e, ha’u fiar katak estudante sira ne’e, sei aproveita di'ak bolsa ida-ne’e no espera katak husi bolsa ne’e estudante sira bele gaña esperiénsia no kria esperiénsia ba futuru Timor-Leste nian”, tenik Embaxadór.
Iha fatin hanesan reprezentante bolseiru Joaninha de Fátima Tilman Magno, sente orgullu tanbá bele hetan bolsa ne'e hodi tulun ona família no hakman sira nia ekonomia liuhusi bolsa ida ne’ebé oferese husi Osaka Gas Fundation.
“Ha’u sente orgullu tebes bele hetan bolsa ne'e, tanba bele ajuda ami durante iha ami-nia prosesu estudu no agradese ba Osaka Gas Fundation nia apoiu husi bolsa ida bele hakman mós ami-nia família nia ekonomia”, hatete Bolseira.
Bolseiru na’in 30 FECT nian ne’e, kompostu husi Departamentu Engeñaria Mekanika (6), Engeñaria Civil (6), Engeñaria Eletroniku no Eletrika (6), Engeñaria Informátika (6) no Departamentu Geologia Petroliu (6).
partisipa husi Visereitora ba Asuntu Estudantís, Profesora Lígia Tomás Correia, Proreitór, Diretór Ezekutivu FDCH, Julio Aparicio, Reprezentante Jica nian iha Timor-Leste, Dekanu, Vise-Dekanu, Diretór Departamentu, Dosente no Konvidadu sira.
Média UNTL 
: Domingos Amaral
: Domingos AmaralFoto 
: Denilson Amandio Barros
: Denilson Amandio Barros