Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D hamutuk ho estrutura halo konferénsia imprensa hodi anúnsia kona-ba orientasaun jerál ba regularizasaun matrikula hahú husi 2002 to’o 2012 hamutuk rihun sia atus rua limanulu resin lima (9255), sei estende tan prazu preskrisaun/Drop Out husi Abril to’o Outubru 2024.
Konferénsia imprensa ne’e, hala’o iha sala-videokonferénsia UNTL nian, Dili (24/04), ho objetivu hodi fo-sai ba públiku kona-ba regularizasaun ba estudante la ativu, tuir dadus ne’ebe rejista iha Sistema Informasaun Rejistu Akademiku (SIRA) hamutuk rihun limanulu-resin ida, atus rua limanulu-resin ualu (51.258) no estudante ne’ebe la ativu hamutuk 25.021 ho 52,4%.
Liuhusi eventu ne’e anúnsia katak, implementasaun Drop Out ba etapa primeiru hahú husi 2000-2012, tanba ne’e totál estudante la ativu hamutuk, rihun sia atus rua limanulu resin lima (9255) bazeia ba prazu ne’ebé determina ona iha nota imprensa nian.
Liuhusi nota konferénsia ne’e mós refere katak, universidade fó opotunidade ba estudante sira durante tinan ida fulan neen hahú husi fulan Agostu tinan 2022 to’o fulan Fevereiru 2024, maibé estudante hamutuk atus haat sanulu (410) mak halo ona readmisaun, tanba ne’e nafatin informa ba estudante sira ne’ebé hakarak mai konklui estudu bele hakbesik ba universidade hahú husi fulan Abril to’o loron 31 fulan Outubru tinan 2024, liu data ne’e mak UNTL sei hamoos naran sira-ne’e husi sistema no lakon ona sira nia direitu nu’udar estudante UNTL.
Leitura ba konferénsia ne’e, akompaña husi visereitór, proreitór, no dekanu husi fakuldade sanulu.
