Universidade Nacional Timor Lorosa’e (UNTL), nia Proreitór ba Asuntu Informatizasaun, Transformasaun Dijitál no Inovasaun (PRAITDI), Profesór Frederico Soares Cabral, hateten, progresu ba Sistema Gestão Património (SGP) iha Diresaun Nasional Lojístika no Manutensaun (DNLM), dadaun ne’e funsionáriu sira bele asesu no entry-dadus tuir diresaun no fakuldade sira.
“Aleinde Sistema Informasaun Akadémika, ita mós foku ba dijitalizasaun hodi apoiu ba Diresaun Nasional Lojístika no Manutensaun (DNLM), atu bele dijitaliza asset material lojístika UNTL nian, ne’ebé seidauk jere ho di’ak. Dadaun ne’e bele jere ona sistema dijitalizasaun hodi arkiva no rejistu liuhusi sistema ne’e rasik”, hateten Proreitór iha Kampus Sentral, Díli (08/04).
Iha sorin seluk Diretora DNLM, Sra. Odete Fatima da Cruz Monteiro hateten, dadaun ne’e implementa ona sistema SGP hodi entry-dadus jestaun patrimóniu no konsege entry hotu dadus 2023 nian, maski ho limitasaun rekursu nafatin kontinua entry-dadus ba tinan 2024 nian.
“Ita implementa ona sistema jestaun patrimóniu husi manual ba dijital no sistema ne’e mós ladook husi ami-nia sistema manual no uza sistema dijital ne’e nia benefísiu maka ita bele asegura (save) iha sistema. Nomós ita bele asesu liuhusi user ne’ebé iha no hafasil ita atu hetan dokumentu servisu nian ho lais”, dehan Diretora.
Média UNTL 
: Eugenia de Jesus
: Eugenia de JesusFoto 
: Laurindo da Cruz
: Laurindo da Cruz