Universidade Nacional Timor Lorosa’e (UNTL) liuhusi Faculdade de Direito (FADIR) nia Profesór José Tomas Alves, eleitu unianimidade ba dekanu períodu 2024-2028 ho totál votu 5, nu’udar kandidatu úniku ba Dekanu.
Iha Sala de Aula A16 kampus Sentral UNTL nian Díli (12/04), liuhusi diskursu dekanu eleitu, Profesór Jose Tomas Alves, agradese ba dosente sira ne’ebé depozita ona konfiansa hodi lidera FADIR ba períodu 2024-2028, hodi implementa planu ne’ebé nia rasik aprezenta, no sei aprosima servisu hamutuk hodi haree saida mak presiza atu kontinua nune’e lori fakuldade ba sentru exelénsia.
“Agradese ba imi-nia konfiansa, tanba kolega sira fó ona konfiansa mai ha’u, konfiansa ida-ne’e laos hau mesak, maibé ita hotu mak sei servisu hamutuk hodi lori fakuldade ne’e ba oin no husu atu ita bele servisu hamutuk di’ak liután”. Dehan Profesor José.
Iha sorin seluk, Dekanu Interinu Mestre Pe. Julio Crispin, hateten eleisaun ne’e demokrátiku tebes, atu bele hadia fakuldade no atu ba oin dokumentu ofisiál sira hanesan diploma ba estudante sira nian bele asina.
“Ha’u mós agradese ba Dekanu Eleitu, tanba bele possivel hodi kandidatu ba Dekanu FADIR nian, atu bele servisu hamutuk hodi lori fakuldade ne’e ba oin liuliu bele asina ba dokumentu prinsipál sira no ba diploma estudante sira-nian bainhira graduasaun”, dehan.
Tuir Prezidente Komisaun Organizadora Profesora Pryscilia Ximenes hatete, iha Dezembru 2023 mak fo sai anúnsiu, maibé kandidatu úniku (ida deit) mak mai registu no extende fali iha Fulan Marsu maibé dosente sira la mai rejistu entaun deside halo eleisaun ba dekanu úniku.
“Dosente ne’ebé mai rejistu mak tenki prienxe rekezitu tuir estatutu Universidade no Fakuldade nian”, dehan Profesora Pryscilia.
Média UNTL 
: Laurindo da Cruz Gomes
: Laurindo da Cruz GomesFoto 
: Eugenia de Jesus Guterres
: Eugenia de Jesus Guterres