Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH,Ph.D, prezide serimónia Isar Bandeira, iha semana dahuluk fulan Abril nian, ne’ebé realiza iha Kampus Sentral, UNTL nian, Díli (1/04).
Iha diskursu Reitór, hato’o Boas Festas Santo Pascoa ba sivitas akadémika hotu ne’ebé selebra ona loron paskoa.
“Espera katak ho selebrasaun loron paskoa ba tinan ida-ne’e ita bele hetan grasa, espíritu no vontade. Nune’e bele kontinua ita-nia servisu hotu ho responsabilidade ba atividade tomak iha tinan ida-ne’e ho susesu”, dehan Reitór.
Reitór mós hatutan katak fulan abril ne’e importante tebes, tanba ba timoroan hotu hodi selebra mós Revolução dos Cravos ne’ebé akontese iha Portugal (25 de abril 1974) ne’ebé lori liberdade no lori demokratizasaun ba Portugal ne’ebé iha momentu ne’ebá fó mós impaktu ba Timor-Leste.
“Hanesan komunidade CPLP ita mós rekoñese eventu ne’e (Revolução dos Cravos ne’ebé akontese iha Portugal 25 de abril 1974), tanba husi ne’e mak ita hetan vitória hodi kontinua luta ba ukun rasik aan”, relembra Reitór.
Reitór mós agradese ba estudante no dosente husi Faculdade de Agricultura (FAGRI) ne’ebé responsabiliza ona eventu ne’e ho korpu-isar bandeira no korru.
Partisipa husi Visereitór, Proreitór, Diretór Jerál, Diretór Nasional, Diretór Departamentu, Dekanu, Dosente, Funsionáriu no estudante sira.
