Universidade Nacional Timor Lorisa'e (UNTL) nia Magnífiku Reitór Profesór dr. João Soares Martins, MPH, Ph.D asina akordu ho Ministériu Saúde (MS), Hospital Nacional Guido Valadares (HNGV) no Prezidente Institutu Nacional Saúde Públika (INSP), iha sala-enkontru Palácio de Cinzas, Dili (26/03) hodi koopera iha Programa Família Médiku, programa ne'ebé apoiu husi Australian Goverment nia Departament of Foreing Affairs and Trade (AGPFAT).
"Programa Família médiku ne'e iha tinan 2014 UNTL hamutuk ho Ministériu Saude no Embaixada Australia inísia, maibé paradu tiha, ha'u hanoin to'o ona tempu para ita reforsa pesoal saúde sira iha área jestaun no klinika nian.
Formasaun ne'e ho durasaun tinan rua, no UNTL nia responsabilidade mak atu haree katak, sira tenke termina formasaun ho mínimu 60 ICTS hodi kualifika hanesan pós graduado", dehan Reitór liuhusi entrevista.
Iha fatin hanesan, Vise-Ministru Fortalecimento Instituisional Saúde (VMFIS) nian, S.E. José dos Reis Magno hatete, akordu ne’e importante tebes hodi koopera iha programa família médiku, tanba iha postu saúde no klinika seidauk iha médiku senior, tanba ne'e importante tebes atu apoiu pesoal saúde sira sira liuhusi formasaun iha área jestaun no klínika nian.
"Ohin ita asina akordu ho parte tolu, hodi koopera iha programa família médiku, ha'u hanoin programa ne'e importante tebes hodi apoiu ita-nia pesoal saúde sira, iha área jestaun no klinika nian, tanba ita-nia postu saúde sira seidauk iha senior hodi koloka fasilidade sira, no programa ne'e ho formasaun durante tinan rua, ita sei oferese uluk ba ema na'in 25", dehan Vise-Ministru.
Iha serimónia asina akordu husi parte haat mak hanesan, Ministériu Saúde reprezenta husi Vise Ministru Fortalecimento Instituisional Saúde (VMFIS) nian, Sr. José dos Reis Magno, Prezidente INSP-TL, Dra. Merita Antonia Armindo Monteiro, Diretora Ezekutivu nu'udar mós prezidente Konsellu Diretiva HNGV, Sra. Cécilia Barros Mendonça.
Partisipa husi Visereitór ba Asuntu Pósgraduasaun no Peskiza nian, Profesór Afonso de Almeida, Proreitór ba Asuntu Kooperasaun, Profesór Tomé Xavier Jerónimo, Dekana Faculdade de Medicina Ciência da Saude, Profesora Lídia Gomes no konvidadu sira.
Média UNTL 
: Leonia de A. da Costa
: Leonia de A. da CostaFoto 
: Eugenia de Jesus
: Eugenia de Jesus