UNTL-VPM HALO ABERTURA ENKONTRU TRIMESTRÁL PAPÉL AUDITORIA NO INSPESAUN

Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, MPH, Ph.D, ho S.E. Vice-Primeiro Ministro, Ministro Coordenador dos Asuntos Sociais e Ministro do Desenvolvimento Rural e Habitação Comunitaria, Eng. Mariano Asanami Sabino, halo abertura ba enkontru trimestrál ho tema “Papél Auditoria no Inspesaun Hodi Garante Servisu Administrasaun Públiku ne'ebé Kualidade Transparente no Imparsial”.

 

"Agradese ba Vice-Primeiru Ministru nia disponibilidade hodi partisipa iha eventu ne'e, no papél auditoria inspetór ne'e importante atu garante ita-nia instituisaun rasik nomós xefia sira ne'ebé hola parte iha administrasaun públiku estadu nian. Nune’e, bele servisu ho di'ak no responsabiliza hodi bele kria oportunidade hanesan ba sidadaun Timor-Leste", dehan Reitór iha, Auditóriu FECT Hera, Dili (26/03).

 

Reitór dezeja katak, liuhusi diskusaun ne'e instituisaun hotu atu bele partilla esperiénsia nune'e bele hariku liután dezempeñu hodi garante servisu administrasaun di'ak ba povu tomak.

 

Iha fatin hanesan S.E. Vice-Primeiro Ministro, Ministro Coordenador dos Asuntos Sociais e Ministro do Desenvolvimento Rural e Habitação Comunitaria, Eng. Mariano Asanami Sabino, hateten enkontru ne'e importante atu bele avalia servisu ne'ebé presiza halo di'ak liután ba iha inspetór auditoria hodi asegura implementasaun ho kualidade.

 

"Auditoria no inspesaun ne'e la'ós de'it haree tuir ezekutador sira depois mak halo avalia iha loron ikus, maibé tenki akompaña husi inísiu planeamentu ne'e loos ka lae atu imi bele kontribui no fó ideia tuir duni vizaun jeral estadu nian ne'ebé hatur iha Planu Estratéjiku Dezenvolvimentu Nasionál (PEDN)", tenik VPM.