Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, MPH,Ph.D, simu doasaun livru ho títulu hamutuk hitunulu (70) husi Embaxadór Japaun iha Timor-Leste Mr. Tetsuya Kimura, iha sala Biblioteka Sentral UNTL, Díli (20/03).
Iha entrevista Reitór agradese ba Embaxadór Jepaun ba laran luak hodi oferese livru mai UNTL, ho doasaun livru hirak ne’e bele hariku liutan universidade nia kolesaun livru iha biblioteka nomós bele fasilita estudante no profesór sira ne’ebé iha interese atu halo leitura iha Língua Japaun.
“Doasaun livru hirak ne’e hanesan oportunidade diak ida ba estudante no ema hirak ne’ebé iha interese atu halo literatura nomós hakarak koñese kultura sosiedade Japaun nian, bele mai asesu livru hirak ne’e iha biblioteka UNTL”, dehan Reitór.
Iha diskuru Embaxadór Japaun Mr. Tetsuya Kimura senti kontente, tanba bele oferese livru hitunulu (70) husi projetu Read Japaun nian ba UNTL liuhusi livru hirak ne’e bele kontribui ba estudu Japones iha UNTL.
“Ha’u espera katak livru hirak ne’ebé oferese ko’alia kona-ba imajen Japaun nian, nune’e bele ajuda estudante, peskisadór no profesór sira hodi promove komprensaun mútua entre Timor-Leste no Japaun”, hatutan Embaxadór.
Livru livru ho títulu hamutuk hitunulu (70) ne’e kobre iha área barak inklui Polítika Japaun nian, Relasaun Internasional, Ekonomia, Jestaun, Sosiedade, Kultura no História.
Partisipa iha serimonia ne’e Visereitór, Proreitór, Dekanu, Dosente no Funsionáriu inklui estudante sira.
Média UNTL:
Mario Jonio Mendonça
Mario Jonio MendonçaFoto:
Agustinho da Cruz e Silva
Agustinho da Cruz e Silva