Universidade Nacional Timor Lorosa’e (UNTL) liuhusi Direҫão Nacional Avaliaҫão Académica e de Garantia da Qualidade Interna (DNAAG-QI) servisu hamutuk ho Agência Nacional para Avaliaҫão e Acreditaҫão Academica (ANAAA) hodi disemina informasaun ba fakuldade sira ne’ebé atu halo re-avalia husi ANAAA, durante loron (18 to’o 22 Marsu 2024).
Diretór DNAAG-QI, Sr. Agostinho Quelo, iha salaun FCE, Balide Díli (18/3) hateten, formasaun refere atu disemina informasaun ba fakuldade sira ne’ebé sei halo re-avalia husi ANAAA iha tinan akadémika 2024 ne’e.
“Formasaun ida-ne’e atu haree fila fali rekomendasaun anterior ne’ebé avaliadór sira rekomenda mai UNTL karik iha mudansa balu ita presiza tau iha relatóriu. Nune’e ita bolu formador sira husi ANAAA hodi fahe informasaun no koñesimentu ne’ebé iha hodi prienxe relatóriu template ne’ebé iha’’, dehan Diretór.
Iha fatin hanesan formadora Ofisial Qualidade ANAAA, Sra. Dircia Belo hateten objetivu husi formasaun ne’e atu fahe informasaun ba fakuldade liuliu ba departamentu hitu atu hakat ba akreditasaun no avaliasaun.
“Iha tinan lima liu ba sira halo ona avaliasaun no iha tinan ida-ne’e sira sei iha re-avaliasaun ba II siklu ba kursu hitu ne’e, tanba ne’e mak ita prepara no akompaña hodi haree fila fali rekomendasaun sira hodi hadia diak liu tan no husi formasaun loron lima ne’e oinsa sira prienxe relatoriu auto-avaliasaun tuir estandarte sanulu ne’ebé ANAAA iha’’, dehan.
Formasaun ne’e partisipa husi FEAH nia departamentu haat hanesan Biologia, Kímika, Fisika no Língua Inglesa, FTAICC nia Departamento de Comércio e Turismo, FECT nia Departamento de Engenharia Mecánica e Engenaria Electrónika no FFCH nia Departamento de Filosofia.
Média UNTL:
Eugenia de Jesus
Eugenia de JesusFoto:
Laurindo da Cruz
Laurindo da Cruz