Universidade Nacional Timor Lorosa'e (UNTL), nia Visereitór ba Asuntu Pos-Graduasaun no Peskiza, Profesór Afonso de Almeida, reprezenta Magnífiku Reitór hamutuk ho Diretora Ezekutiva hanesan mós Presidente Konsellu Diretiva Hospital Nacional Guido Valadares (HNGV), Sra. Cecília Barros Mendonça, halo abertura Estájiu Klínika ba estudante atus ida haatnulu resin hitu (147), iha Salaun HNGV, Díli (14/03).
Iha diskursu Profesór Afonso de Almeida, agradese ba Prezidente Konsellu Diretiva no estrutura HNGV nian ne'ebé disponivel hodi simu estudante sira bele halo prátika klínika iha ospital nasionál.
"Ami agradese ba HNGV ne'ebé bele disponibiliza, ajuda no fó apoiu hodi forma joven sira ba futuru enfermeiru, nomós prátika klínika ne'e hanesan parte ida husi sira-nia estudu. Ne'e importante atu sira bele aplika koñesimentu durante prosesu aprendizajen hodi dezenvolve abilidade téknika nomós sira bele hetan esperiénsia husi profisionál saúde sira", tenik Visereitór.
Diretora Ezekutiva hanesan mós Presidente Konsellu Diretiva (HNGV), Sra. Cecília Barros Mendonça, hatete, prátika klínika ne'e atu dezenvolve abilidade no koñesimentu ne'ebé estudante sira hetan iha universidade.
"Objetivu husi prátika ne'e atu desenvolve koñesimentu ne'ebé imi hetan hodi fó asistensia ba pasiente sira, nune'e husu ba profisionál sira iha HNGV atu tau matan no akompaña alin sira durante halo prátika klínika.
Husu mós ba estudante sira atu uza didiak oportunidade nune'e imi bele aprende prátika sira-ne'e hodi bele fó benefísiu ba imi iha futuru", dehan Cecília.
Estudante na’in 147 ne’e sei hala’o estájiu klínika, hala'o durante fulan tolu hahu husi 14 Marsu to'o 30 Juñu 2024.
Eventu ne’e partisipa husi Proreitora ba Asuntu Provedoria no Akonsellamentu, Profesora, Teresa de Jesus Vaz Cabral, Dekana FMCS, Profesora Lídia Gomes, Diretora Enfermajen no Parteira HNGV, Sra. Maximiana Libania Sagrada Ferrão, Asesór Étika HNGV, Sr. António Caleres Junior, dosente, enfermeiru HNGV nian, no estudante sira.
Média UNTL:
Denilson Amandio Barros
Denilson Amandio BarrosFoto:
Domingos Amaral
Domingos Amaral