Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MPH, Ph.D hamutuk ho Proreitór ba Asuntu Informatizasaun, Transformasaun Dijitál no Inovasaun (PRAITDI) Profesór Frederico Soares Cabral, lansa ona Sistema SIA (Sistema Informasaun Akadémika) hodi transforma prosesu akadémika ne'ebé manuál ba dijitál.
"Ohin ita lansa ona sistema SIA (Sistema Informasaun Akadémika), tanba ne'e ita sei implementa uluk ba fakuldade rua no Diresaun Nacional Lojístika no Manutensaun nia Departamentu Patrimoniu (DNLM). Iha Sistema SIA ne'e rasik bele jere dadus no informasaun sira hanesan, kuríkulu, dosente, estudante, notas, oráriu, konsulta KRS. No Sistema Jestaun Patrimoniu ne'e bele jere dadus sira hanesan, saladeaula, transporte, inklui patrimoniu sira Universidade nian", dehan Reitór, iha lokál eventu, Kampus Sentrál, UNTL, Díli (11/03).
Reitór hatutan, UNTL mós asina ona kontratu ho Ministériu Ensinu Superior Siénsia no Kultura (MESSK), nune'e Faculdade de Engenharia Ciência e Tecnologia mak sei apoiu sistema ne'e ba ensinu superior sira iha Timor-Leste.
Iha fatin hanesan, Proreitór PRAITDI nian, Profesór Frederico Soares Cabral, agradese ba fakuldade sira ne'ebé koopera hodi implementa sistema SIA ne'e, tanba bele muda UNTL husi sistema manuál ba dijitalizasaun.
"Agradese ba kolaborasaun hodi muda UNTL liuhusi sistema dijitalizasaun ne’e, tanba ita presiza dijitaliza dadus sira hanesan, manutensaun hira mak ita halo kada fulan, osan hira mak ita gasta, kombustível hira mak ita uza kada fulan, pelumenus ita iha sistema ida-ne'e. Nune'e estrutura bele akompaña gastu hirak ne'e, no ita presiza duni muda sitema manuál ba dijitál", dehan Proreitór.
Responsável ba Sistema Informasaun Akademika (SIA) ne’e mós hatutan, prosesu ne'e sei implementa ba benefisiariu iha UNTL hamutuk 30.000 mil kompostu husi sivitas tomak, tanba ne'e presiza esforsu makas hodi muda ema nia hanoin husi sistema manual ba dijital.
Sistema ne'e hahú implementa ba Faculdade de Agricultura no Faculdade de Filosofia no planu tuir mai sei implementa mós ba fakuldade sira hotu iha UNTL.
Partisipa husi Eis-Reitór UNTL nian, Profesór Armindo Maia, Visereitór, Proreitór, Diretór Sentru, Diretór Jerál, Diretór Nacional, Dekanu, Xefe Departamentu, Funsionáriu, Estudante no Konvidadu sira.
Média UNTL:
Leonia de A. da Costa
Leonia de A. da CostaFoto:
Mario Jonio Mendonça
Mario Jonio Mendonça