Universidade Nacional Timor Lorosa’e (UNTL) nia ekipa Gabinete Proreitoria ba Asuntu Kooperasaun (PRAC) halo sosializasaun kona-ba bolsa interna ba estudante foun Faculdade de Turismo Artes Indústria Criativas e Culturais (FTAICC) nian, iha orientasaun akadémika ba loron daruak nian iha resintu kampus FTAICC nian, Díli (08/03).
Ekipa Gabinete PRAC, Sr. Antonio Batista informa, sosializasaun ne’e importante hodi fó koñesimentu ba estudante sira kona-ba bolsa interna ne’ebé oferese ba estudante ho kualifikasaun valór ne’ebé di’ak.
“Husi sosializasaun ne’e atu fó koñesimentu ba estudante foun sira kona-ba bolsa interna iha área lisensiadu nian ne’ebé hetan valór ho kualifikasaun di’ak, no kritéria sira ne’ebé presiza priense. Bolsa ida-ne’e UNTL halo kooperasaun ho nia parseiru sira kompostu husi Osaka Gas Foundation, Astomos Energy Corporation husi Embaxada Japaun, Camõe IP husi Embaxada Portugal, Chines Ambassador Scholarship husi embaxador China”, hatutan.
Sr. Antonio mós husu ba estudante foun sira atu prepara aan aprende lingua barak nomos estuda makas nune’e bele hetan valór di’ak hodi bele kompete ba bolsa interna bainhira sira loke oportunidade.
Iha eventu ne’e partisipa husi Ekipa PRAC nian Sra. Jesuina Mendonça, Sr. Flaviano Benedito, estudante no ekipa Komisaun Organizadora ba Orientasaun Akadémika nian.
