Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, MPH, Ph.D, partisipa iha komemorasaun loron Internasionál Feto, ho tema" Investe na Mulher Acelera o Progresso", ne'ebé organiza husi Gabinete Visereitora ba Asuntu Estudantís, hamutuk ho UN Women no Korea International Cooperation Agency (KOICA).
"Parabéns ba feto timoroan hotu nomós iha rai laran no rai liur. Universidade agradese ba UN Women no KOICA ne'ebé servisu hamutuk ho Gabinete Visereitora Estudantís nian hodi realiza atividade kompetisaun TikTok ba estudante sira nune'e joven sira bele adapta ho progresu teknolojia média nian", Reitór dehan iha Auditóriu, Ministériu Transporte e Comunicação nian, Kaikoli Díli, (08/03).
Reitór mós hatutan kompetisaun TikTok ne'e hanesan maneira ida atu halo promosaun ba atividade sira liuliu iha ligasaun kona-ba kestaun promove kampus seguru hodi livre husi asaun violénsia sira, liuliu violénsia bazeia ba jéneru no asédiu seksuál, atu bele kombate injustisa ne'ebé mosu iha sosiedade no iha universidade.
Iha serimónia ne'e mós entrega premiu no sertifikadu ba kompetitor TikTok sira, no iha kompetisaun ne'e, Faculdade de Agricultura sai nu'udar I lugar, Faculdade de Medicina Ciência Saúde II, no Faculdade de Direito III lugar.
Partisipa husi Visereitora ba Estudantís, Profesora Lígia Tomás Correia, Programme Manager UN Women, Ms. Nuntana Tangwinit, County Director KOICA nian iha Timor-Leste, Ms. Younhwa Kang, funsionáriu, konvidadu no estudante sira.
Média UNTL:
Denilson Amandio Barros
Denilson Amandio BarrosFoto:
Denilson Amandio Barros
Denilson Amandio Barros