Universidade Nacional Timor Lorosa’e (UNTL), nia Dekanu Faculdade de Ciências Sociais (FCS) Profesór Alarico da Coata Ximenes, halo abertura orientasaun akadémika tinan letivu 2024 ho tema “Efetividade Prosesu Aprendizajen iha FCS-UNTL’’. Abertura ba orientasaun ne'e realiza iha Kampus Kaikoli, Dili (7/03).
Iha okaziaun ne’e Professor Alarico da Costa Ximenes hatete, orientasaun ne’e atu forma estudante sira-nia an hodi koñese ambiente universidade, liuliu fakuldade nian, hodi prepara-an ba futuru nasaun ni'an liuhusi hakas-an no estuda didi'ak.
"Imi mak futuru Timor-Leste nian, tanba ne'e alin estudante sira utiliza tempu ne’e ho di'ak hodi aprende, estuda atu bele dezenvolve rai ne’e, ha'u hein katak 2028 mandatu remata espera imi mós bele finaliza imi-nia estudu iha Lisensiatura iha fatin ida-ne'e", dehan Profesór Alarico.
Iha fatin hanesan, Prezidente Asosiasaun Estudante (AAF-FCS) Arâo Vital hateten, iha nia mandatu ba tinan 2 nia laran realiza atividade barak tebes hodi promove no fó biban ba estudante sira hodi eleva sira-nia kapasidade no matenek nune’e bele sai ema di’ak.
"Iha ha'u-nia mandatu ho ha'u nia estrutura AAE-FCS halo atividade barak tebes, hodi promove maluk estudante sira, tanba ami-nia servisu mak oinsá atu haree ba probléma ne'ebé estudante sira hasoru. Fasilita mós maluk estudante sira hodi aplika sira-nia talentu atu bele kompete iha fakuldade no universidade’’, dehan Senadu.
Total estudante foun 2024 FCS nian ne’ebé partisipa iha orientasaun akadémika ne’e hamutuk na’in atus neen sanulu resin neen (616).
Média UNTL 
: Aniceto A. dos Santos/ Nazaria de Jesus da Conceição/Auxilia Fátima da Costa
: Aniceto A. dos Santos/ Nazaria de Jesus da Conceição/Auxilia Fátima da CostaFoto 
: Aniceto A. dos Santos /Nazaria de Jesus da Conceição/Auxilia Fátima da Costa
: Aniceto A. dos Santos /Nazaria de Jesus da Conceição/Auxilia Fátima da Costa