Universidade Nacional Timor Lorosa’e (UNTL) nia reprezentante Magnífiku Reitór, atual Visereitór ba Asuntu Akadémika no Garantia Kualidade, Profesór Samuel Venâncio de Sousa Freitas hatete, estudante sira tama ona iha universidade tenke iha responsabilidade, produtivu, inovativu, krítiku, iha era dijitál nian, nune'e hatudu kualidade nu'udar Timoroan.
"Parabéns ba imi, ha'u hakarak husu imi hotu mai husi uma, tama iha UNTL ho kontente no iha universidade tenke iha responsabilidade, nune'e iha vontade di'ak no komitmentu tomak hodi estuda didiak, liuliu tenke kriativu, produtivu no inovativu hodi hatudu ita nia kualidade nu'udar Timoroan iha mundu", dehan Profesór Samuel iha abertura ba orientasaun akadémika iha Faculdade de Educação Artes e Humanidades (FEAH), iha Kampus Liceu, Díli (07/03).
Iha fatin hanesan, Prezidente Senadu Estudante FEAH nian, Nuno Grigorio Viana hateten, iha orientasaun ne’e partisipa husi estudante foun hamutuk atus ualu limanulu (850), husi Departamentu Sanulu (10), bazeia ba númeru ne’ebé mai husi Universidade.
“Estudante ne’ebé ohin partisipa iha orientasaun ida ne’e 850, preparasaun ba atividade orientasaun kuaze semana rua, ha'u espera katak ho númeru estudante ne'e bele aprende buat ruma durante orientasaun iha Palestra husi oradór sira”, tenik Senadu.
Eufrasia Romoada Soares Viegas nu’udar estudante foun iha Departamento de Ensino Matemática, sente orgullu bainhira tama iha UNTL no iha orientasaun ne'e aprende kona-ba oinsá sai nu'udar ema akadémiku ida ne'ebé produtivu liután.
“Ha’u sente kontenti tebes, tanba bele tama iha UNTL, ohin ha'u aprende mak, ami tenke produtivu liuliu fahe ami-nia tempu atu aprende tuir atividade estrakurikular sira iha universidade hodi aumenta ami-nia abilidade”, dehan Romoada.
Oradór ba semináriu iha orientasaun ne'e, Superentindente Prezidente Autoriedade Protesaun Sivil, Sr. Ismael da Costa Babo ho tema (Lei da Proteção Civil e Assuntos Dezastres), Komandante Polisia Trânsitu, Luis da Costa partilla (Codigo de Conduta das Estradas Publicas) no Profesora Ana Maria dos Santos ko’alia kona-ba (Esperiencia Académica na Gestão para Partisipação nas Atividades Curiculares e Estracuriculares no Campus).
Orientasaun ne’e realiza ho tema "Formar Universitários Responsáveis, Produtivos, Inovativos, Concientes e de Bom Caractér na Área de Digitalização, Construir Sinergias Para Alcançar Boas Prestações Académicos Rumo a um Campos de Exelência".
Partisipa iha atividade ne'e, Dekanu ho estrutura, Diretór Departamentu, Dosente, Funsionáriu, Diretór Nacional no estudante sira.
Média UNTL:
Venanciana da Costa
Venanciana da CostaFoto:
Livia M.A Castro, Leonia de Araújo
Livia M.A Castro, Leonia de Araújo