Universidade Nacional Timor Lorosa’e (UNTL) nia estudante foun na’in hitunulu resin tolu (73) husi Faculdade de Filosofia Ciência Humana (FFCH) partisipa iha orientasaun akadémika ho tema “Formar Universitário Responsáveis, Produtivos, Inovativos, Conscientes na Era de Digitalização, iha kampus Sentral, Díli (07/3).
Liuhusi sesuan abertura Dekanu Interinu FFCH nian, Profesor Luis Maia hatete, estudante sira tenki aproveita didi’ak tempu ne’e hodi hetan informasaun husi oradór sira hodi bele hetan koñesimentu atu bele muda mentalidade ambienta universidade nian.
“Ha’u husu estudante sira atu aproveita tempu ida-ne’e hodi rona informasaun husi oradór sira hodi haklean liután koñesimentu no muda imi-nia mentalidade, hanoin no karakter iha nível universitáriu nian’’, dehan Profesor Luis.
Dekanu Interinu ne'e mós hato’o bemvindu ba estudante foun sira no husu estudante atu uza oportunidade durante loron tolu hodi integra a’an iha atividade orientasaun ne’e ho másimu atu bele aprende buat foun.
“Ne’e hanesan inísiu jornada akadémika ba imi-nia estudu, nune’e liuhusi atividade ne’e bele hatene di'ak liu perfil, vizaun no misaun universidade nian no koñese mós estrutura fakuldade nian’’.
Atividade refere partisipa husi dosente, funsionáriu, Asosiasaun Akadémika Estudantíl nian no estudante foun sira.
#TimorLeste # UNTL #FFCH 07 Marsu 2024
Média UNTL:
Eugenia de Jesus
Eugenia de JesusFoto:
Antoneta Ximenes/Serginho da Costa
Antoneta Ximenes/Serginho da Costa