Universidade Nacional Timor Lorosa'e (UNTL), nia Faculdade de Engenharia Ciências e Tecnologia (FECT), kovida oradora Eng. Ermenegilda Laurentina da Costa, husi Instituto de Gestão de Equipamentos e Apoio ao Desenvolvimento Infraestuturas (IGEADI), sai oradora iha orientasaun akadémika ho tema "Importánsia Partisipasaun Feto iha Mundu Enjeñaria ba Dezenvolvimentu Nasional", iha Auditoriu (FECT) Hera, Díli (07/03).
Oradora kongratula estudante foun sira tinan 2024 nian, liuliu ba estudante feto sira ne'ebé desidi hodi kontinua estudu iha FECT hodi prepara Enjeñaria iha Timor-Leste.
"Ha’u mós uluk eskola iha fatin ne'e foti área Enjeñaria Mekánika, nune'e alin sira lalika tauk atu estuda iha área ne'e, importante mak aproveita didi’ak no foti dezafiu sira sai hanesan oportunidade no hakas-an estuda makas, tanba atu dezevolve rai ne'e ba oin presiza mós kontribuisaun husi ita boot sira", dehan Eng. Ermenegilda.
Oradora ne'e mós salienta liután katak, feto prontu atu lidera, tan ne'e presiza kontribuisaun feto nian ba dezenvolvimentu nasionál, liuliu iha área enjeñaria nian no tenki marka diferensa ho fakuldade sira seluk.
“Iha okaziaun ne’e husu ba alin estudante sira aproveita oportunidade no estuda makas hodi alkansa meta hanesan enjeñeru ka enjeñeira iha futuru”, solisita.
Atividade ne'e partisipa husi dosente, Asosiasaun Akadémika Estudantíl FECT nian, Komisaun organizadora no estudante foun sira.
