Universidade Nacional Timor Lorosa'e (UNTL), liuhusi Vice-Reitoria para os Assuntos Estudantís (VRAE), koopera ho MOVE Timor-Leste hodi hasa'e koñesimentu estudante nian liuhusi formasaun empreendedorizmu, iha Auditóriu Faculdade de Economia e Gestão (FEG), Díli (07/07).

Iha entrevista, VRAE Profesora Dra. Bia Ble Hitu Carvalho de Jesus hateten, kooperasaun entre UNTL, parseiru estratéjiku no empresa privadu liuliu MOVE Timor-Leste hametin koñesimentu estudante.

“Liuhusi programa ida-ne'e, estudante sira la aprende de'it teoria, maibé mós hetan esperiénsia prátika no oportunidade atu dezenvolve ideia inovadora hodi responde ba dezafiu real iha mundu negósiu”, dehan Profesora Bia.

Partnership Manager MOVE Timor-Leste Victoria Almeida, hateten katak MOVE koopera ho parseiru sira hodi aprezenta dezafiu negósiu real ba estudante sira atu dezenvolve ideia inovadora no buka solusaun kreativa.

“Inovation Challenge ajuda estudante sira aplika koñesimentu iha área marketing, teknolojia no área relevante seluk, hodi hamenus distánsia entre teoria no prátika no prepara sira ba mundu servisu,” dehan.

Enkuantu Julião Marques Fernandes, estudante husi Departamento de Geologia do Petróleo, Faculdade de Engenharia, Ciências e Tecnologia (FECT), hateten katak formasaun ne'e ajuda aumenta koñesimentu no prepara-an ba futuru.

“Liuhusi formasaun ida-ne'e, ha’u hetan koñesimentu foun kona-ba empreendedorizmu, inovasaun no oinsá transforma ideia sai oportunidade negósiu. Ha’u mós aprende husi empresa sira kona-ba rezolve dezafiu real, uza teknolojia no dezenvolve solusaun inovadora hodi prepara-an ba kria oportunidade servisu no kontribui ba dezenvolvimentu Timor-Leste iha futuru,” dehan Estudante Marques.

Partisipa husi Diretora Centro Estudo Gênero -UNTL, Professora Dulce Martins da Silva, Ph.D, ekipa MOVE Timor-Leste, dosente sira, reprezentante empresa privadu no estudante sira.