Universidade Nacional Timor Lorosa’e (UNTL) liuhusi Gabinete Vice-Reitoria para os Assuntos Estudantís (GVRAE) distribui sertifikadu apresiasaun ba kompetitór diskursu lian ba Dame, Klubu Futebol Akadémiku no Taekwondo iha Auditórium FEG, Díli (9/07).
Iha diskursu VRAE Profesora Bia Ble Hitu Carvalho de Jesus, hato’o parabens ba kompetitór sira, tanba bele esforsu lori UNTL nian naran partisipa iha atividade estrakurrikular sira hodi sai mós hanesan manan na’in hodi simu mós taxa ne’ebé entrega ba UNTL no medalla ba sira rasik.
“Atividade estrakurrikular sira-ne’e ajuda mós imi atu kapasita imi-nia aan hodi aprende mós oinsa disiplina. Servisu ekipa no atividade sira-ne’e ba oin ita sei promove nafatin atu estudante hotu bele hetan opurtunidade partisipa iha nível internasional”, Dehan VRAE.
Iha fatin hanesan Mentor Programa Sr. Amancio Horácio hatete, distribuisaun sertifikadu ne’e atu bele rekoñese no valoriza ba sira-nia talentu ne’ebé hatudu ona no atividade ne’e atu promove mós língua liuliu iha Inglés, tanba agora TL mós hanesan Membru ASEAN nian.
“Hatudu nafatin imi-nia talentu sira iha área sira Taekwondo, Futebol no área seluk tan. Hadia mós língua liuliu iha Inglésh, tanba ita nu’udar Membru ASEAN ona, ita hetan opurtunidade atu partisipa iha nível internasional ita bele halo komunikasaun di’ak ho ema seluk”. Dehan Sr. Amancio.
Kompetitór ne’e kompostu husi modalidade Taekwondo na’in-6 ne’ebé partisipa iha Kompetisaun Ambassador Cup no Klubu Futebol Akadémiku na’in-20 inklui Treinadór, Kompetisaun Diskursu ba Dame ne’ebé Organiza husi Sentru ba Paz iha Korea do Sul estudante na’in-6 partisipa via-online.
