Universidade Nacional Timor Lorosa’e (UNTL) liuhusi Gabinete Vice-Reitoria Para os Assuntos Estudantís realiza workshop Kampus Verde ba reprezentante estudante husi fakuldade (10) ne’ebé atu partisipa kompetisaun iha nível fakuldade iha Kampus Faculdade de Economia e Gestão (FEG), Díli (23/07).
Iha diskursu VRAE Profesora Bia Ble Hitu Carvalho de Jesus, agradese ba oradór sira tanba partilla ona esperiénsia ba estudante sira kona-ba hanoin krítiku no oinsa servisu hamutuk atu partisipa kompetisaun kampus verde.
“Workshop ida-ne’e ita organiza hodi kapasita estudante sira-nia koñesementu no kapasidade hodi partisipa iha kompetisaun kampus verde atu oinsa bele valoriza ita-nia natureza. Kompetisaun kampus verde ne’e atu fó biban ba estudante sira bele hamosu rasik sira-nia ideia hodi kria kampus verde iha ida-idak nia fakuldade”, Dehan VRAE Bia.
Iha fatin hanesan Diretór Ezekutivu ETDA nu’udar Oradór Sr. Januario Mok hatete, partilla ba estudante sira kona-ba “Critical Thinking & Team Work Hodi Harii Kampus Verde no Futuru Sustentavel” ba estudante sira hodi aumenta sira-nia koñesementu hodi moris iha natureza di’ak iha kampus.
“Hanoin krítiku ne’e mosu atu Ita bele uza rekursu sira ne’ebé iha, sai vale ba buat ruma ne’ebé bele fó benefísiu ba ita ema no husi hanoin krítiku ne’e presiza ita atu servisu hamutuk hodi hare mós konsekuénsia husi buat ruma ne’ebé ita halo atu bele kria kampus verde ne’e husi ita hotu nia ideia no servisu hamutuk atu halo mudansa”, Dehan Sr. Januario.
Estudante FCSP nu’udar mós partisipante Zelinda Soares dos Reis Fernandes senti kontente, tanba bele hetan formasaun sira hanesan ne’e hodi kapasita estudante sira-nia hanoin atu bele kria kampus verde ne’ebé di’ak ba estudante hotu iha universidade.
“Worshop ida-ne’e hanorin ami atu oinsa bele iha ideia kreativu no krítiku hodi kria kampus verde iha fakuldade nomós atu oinsa bele servisu hamutuk, ha’u fiar katak ami sira ne’ebé partisipa iha atividade ida ne’e sei fila ba partilla fali ba estudante sira seluk iha ida-idak nia fakuldade”, Dehan Zelinda.
Atividade ne’e partisipa husi oradór sira husi CALTECH Sra. Joana Araújo partilla kona-ba “Importansia Konservasaun Ambientál husi Meiu 3R” no Diretór Ezekutivu ETDA Sr. Januario Mok koalia kona-ba Critical Thinking & Team Work hodi harii Kampus Verde no Futuru Sustentável”.
