Universidade Nacional Timor Lorosa’e (UNTL) nia Magnífiku Reitór Profesór Dr. Joviano António da Costa, M. Eng, simu vizita husi Ms. Wu Sheng nu’udar Suport Advisor husi University of Nottingham Ningbo China (UNNC) ho estudante sira hodi troka esperiénsia iha área Siénsia Medisina.

Iha diskursu Reitór agradese ba ekipa husi UNNC, tanba hili ona UNTL hodi aprende hamutuk no hanesan estratéjia hodi haforsa foinsae sira-nia abilidade.

“Agradese ba UNNC, tanba hili ona UNTL hodi troka esperiénsia kona ba diferensia kultura no aprende kona ba Siénsia Medisina no hospitalidade nian ho estudante sira. Espera husi kooperasaun ne’e bele kontinua ba oin di’ak liu tan”, dehan Reitór iha Auditoriu Faculdade de Ciências Sociais e Políticas (FCSP), Caicoli, Díli (24/07).

Suport Advisor husi UNNC nian, Ms. Wu Sheng dehan, espera husi prosesu sira-ne’e bele tulun estudante sira bele aprende buat foun no bele aplika iha futuru.

“Agradese ba UNTL bele simu ona ami-nia universidade hodi troka esperiénsia hamutuk ho estudante sira, husi kooperasaun ne’e bele aprende diferensia estudu, kultura no siénsia sira”, dehan Reprezentante UNNC nian.

Estudante sira ne’ebé partisipa iha formasaun ho tema “Youth Health Education and Chinese Cultural Exchange Program” husi Faculdade de Medicina e Ciência da Saúde (FMCS)- UNTL hamutuk na’in 40 no estudante husi UNNC hamutuk 12.

Partisipa husi Proreitór ba Asuntu Kooperasaun nian, Profesór Cristovão dos Reis, Dekana FMCS Profesora Lídia Gomes, dosente, estudante no konvidadu sira.