Universidade Nacional Timor Lorosa’e (UNTL) nia Magnífiku Reitór Profesór Dr. Joviano António da Costa, M.Eng, asina akordu ho UNDP (United Nations Development Programme), iha Videokonferénsia, UNTL nian, Díli (22/07).

Reitór agradese ba UNDP ba apoiu no kooperasaun kontinua ba universidade, no agradese ba KOICA, tanba sempre hamutuk ho UNDP hodi apoiu atividade sira liuliu área interesada sira.

“Agradese ba parseiru sira-nia apoiu no ohin ita selebra akordu ida-ne’e ho objetivu atu bele apoiu hasae koñesimentu, prátika no peskiza sira iha UNTL liuliu haforsa joven sira-nia kriatividade no abilidade iha area oioin”, dehan Reitór.

Reprezentante UNDP nian iha Timor-Leste, Ms. Adeline Carrer agradese mós tanba Timor Leste iha joven produtivu barak, tanba ne’e presiza deit kapasitasaun kontinua nune’e haforsa sustentabilidade edukasaun iha ensinu akadémiku nian ba futuru.

“Parabéns ba UNTL, tanba bele asina ona akordu ho UNDP hodi haforsa sustentabilidade edukasaun iha ensinu akadémiku no peskiza sira, espera katak husi akordu ida ne’e bele tulun no apoiu estudante no joven sira nia abilidade no koñesimentu iha área oioin iha universidade”, dehan Reprezentante UNDP.

Akompaña husi Visereitora ba Asuntu Estudantís, Profesora Bia Ble Hitu Carvalho de Jesus, Proreitór ba Asuntu Kooperasaun nian, Profesór Cristovão dos Reis, Program Manejer KOICA nian, Ms. Eunji Kim, ekipa UNDP, asistente tékniku no konvidadu sira.