Universidade Nacional Timor Lorosa’e (UNTL) nia Administradór Jerál (AG), Prof. José Dionísio Ximenes hatete katak, dadaun ne’e sei fó prioridade ba hadi’a no moderniza sala-de-aula sira hodi hadi’a kondisaun infraestrutura no aumenta ambiente di’ak ba estudante sira iha prosesu aprendizajen.

“Ba modernizasaun sala-de-aula, dadaun ne’e sei hahú husi Kampus Sentral hafoin kontinua ba fakuldade seluk iha universidade, tanba infraestrutura sira iha fatin ne’e presiza manutensaun, liuliu odamatan no janela sira ne’ebé kondisaun la di’ak.

Aleinde ne’e sei instala AC no projetór iha sala-de-aula sira, atu estudante sira sente konfortavel bainhira partisipa iha prosesu ensinu”, hatete Prof. José Dionísio iha Kampus Sentral, Díli (17/09).

Profesór José Dionísio mós hatutan katak, liuhusi vizita no avaliasaun ba infraestrutura iha fakuldade sira, konsege rezolve ona problema balun hodi responde ba preokupasaun sira husi sivitas akadémika.

“Problema infraestrutura bázika balun rezolve ona, hanesan hariis-fatin iha Faculdade de Ciências Sociais e Políticas (FCSP) iha Kaikoli, Faculdade de Medicina e Ciências da Saúde (FMCS) iha Lahane, no hariis-fatin iha Kampus Sentral. Portaun ida mós hadia ona. Dadaun ne’e, kontinua halo manutensaun ba jardim sira”, hatutan Administradór Jerál.

Eis-Dekanu FMCS ne’e mós akresenta katak, aleinde halo manutensaun ba sala de aula sira, universidade dadaun ne’e kontinua reabilita no halo manutensaun ba Gabinete Reitoria, inklui Gabinete Reitór, Vise-Reitór, Pro-Reitór no Sala Videokonferénsia iha Kampus Sentral.