Universidade Nacional Timor Lorosa'e (UNTL), liuhusi nia Magnífiku Reitór, Profesór Dr. Joviano António da Costa, M.Eng halo abertura ba kolókiu dahuluk ho tema "Educação, Cultura e Responsabilidade Social", ne'ebé organiza husi Programa Pós-Graduasaun no Peskiza (PPGP) iha Visereitoria Asuntu Pós-Graduasaun no Pesquisa (VRPGP), iha Auditóriu Faculdade de Economia no Gestão (FEG), Díli (22/07).

Iha diskursu abertura, Reitór hataten, kolókiu ne'e sai espasu importante atu halo reflesaun akadémika, troka esperiénsia no fahe koñesimentu entre profesór, peskizadór no estudante sira.

"Parabéns ba Komisaun Organizadora, tanba bele organiza atividade refleta ba (Edukasaun, Kultura no Responsabilidade Sosiál) ne'e importánsia boot ba dezenvolvimentu Timor-Leste, tanba área tolu ne'e iha relasaun metin ba malu. Edukasaun ho kualidade tenke bazeia ba komprensaun kona-ba realidade sosiál no kultura, no futuru nasaun bele harii bainhira ita valoriza koñesimentu, esperiénsia no valor sira ne'ebé sai identidade povu timoroan”, dehan Reitór.

Iha oportunidade hanesan, Koordenadór Kolókiu, Profesór Vicente Paulino, hateten katak kolókiu ne'e atu hametin kultura peskiza no promove fahe koñesimentu sientífiku iha komunidade akadémika.

“Atividade Kolókiu ne'e ho objetivu atu promove koñesimentu sientífiku no fahe rezultadu peskiza entre dosente, peskizadór no estudante sira. Liuhusi aprezentasaun no diskusaun sira-ne'e, ami hakarak haforsa kultura peskiza no kontribui ba dezenvolvimentu edukasaun, kultura no sosiedade iha Timor-Leste”, dehan Profesór Vicente.

Partisipasaun husi estudante sira Programa Pós-Graduasaun no Peskiza (PPGP), Departamento de Língua Portuguesa no Tetun UNTL, dosente no estudante sira husi instituisaun ensinu superior seluk.