Universidade Nacional Timor Lorosa'e (UNTL) liuhusi Gabinete Vice-Reitoria para os Assuntos Estudantís (GVRAE) servisu hamutuk ho Centro de Estudo de Género, Diversidade e Inclusão (CEG), ho FOKUPERS (Forum Komunikasaun ba Feto Timor-Leste), no Assosiasaun Juventude Hakbiit Justisa Timor Leste (AJHJTL) realiza formasaun kampus seguru no violénsia bazeia ba jéneru ba estudante sira.
Iha diskursu VRAE Profesora Bia Ble Hitu Carvalho de Jesus hateten, sensibilizasaun ne’e hodi bele garante estudante sira hotu hala’o estudu livre husi asédiu sexual no violénsia bazeia ba jéneru.
"Atividade ne’e halo atu prevene kazu asédiu seksual no violénsia bazeia ba jéneru no atu harii kampus ida ne’ebé respeita malu no sai hanesan respsota ida ba preokupasaun sívitas akadémika nian”, Dehan VRAE iha Auditórium FECT-Hera, Díli (30/07).
Diretora CEG Profesora Dulce Martins da Silva, Ph.D hateten, formasaun ne’e realiza atu prevene asaun asediu sexual husi estudante, funsionáriu no deosente sira.
"Atividade sira-ne’e ita halo atu bele fahe informasaun ba sívitas akadémika sira hodi prevene asaun asediu sexual iha kampus nune’e ita bele livre iha kampus no kombate hasoru hahalok violensia sira no mós atu partilla ba sívitas akadémika kona-ba Violensia Bazeia ba Jéneru”, Dehan Profesora Dulce.
Reprezentante Diretora FOKUPERS no atuál Koordenadora Empoderamentu Sobrevivente Sra. Mercia de Jesus Lopes, hato’o agradese ba UNTL ba kooperasaun forte hodi promove kampus seguru atu bele dignifika kampus, livre husi asediu sexual no violénsia Bazeia ba Jéneru.
"Ita hotu iha responsabilidade atu asegura ambiemte akadémika ne’e sai fatin ba ema hotu bele aprende, servisu no dezenvolve aan ho dignidade respeita no seguransa”, dehan.
Atividade ne’e realiza, tanba servisu hamutuk GVRAE ho Centro Estudo de Género, FOKUPERS no hetan apoiu husi Gabinete de Apoio Sociadade Civíl (GASC). Enkuantu formasaun fasilita husi Asosiasaun Juventude Hakbiit Justisa Timor Leste (AJHJ-TL).
Partisipa husi estudante Faculdade de Engenharia Ciências e Tegnologia (FECT) no Faculdade de Agricultura (FAGRI).
