Universidade Nacional Timor Lorosa’e (UNTL) nia Visereitora Para os Assuntos Estudantís (VRAE) Profesora Bia Ble Hitu Carvalho de Jesus hatete, estudante UNTL na’in-hitu (7) inklui funsionáriu GVRAE nian treinadu husi Australia no New Zealand Bank (ANZ) hodi sai hanesan formadór ba programa Money Minded.

“Ita-nia estudante na’in-7 inklui funsionáriu GVRAE ne’ebé partisipa ona iha formasaun Training of Trainers (TOT) ne’ebé organiza husi ANZ, hetan akreditasaun sai hanesan formadór/a hodi fasilita fali formasaun Programa Money Minded ba estudante sira iha UNTL nomós estudante husi Universidade seluk”, dehan Profesora Bia iha Kampus Sentrál, Díli (10/07).

Profesora Bia hatutan katak, formadór sira-ne’e agora dadauk fó ona formasaun ba estudante finalista sira ne’ebé representa husi fakuldade sanulu (10) nomós fasilita ona formasaun ba estudante sira husi Dili Institute of Technology (DIT) no sei fó mós formasaun ba estudante sira seluk.

Iha sorin seluk, Formadora ba Programa Money Minded Imelda Estefania Lay hatete, formasaun TOT ne’e di’ak tebes, tanba kapasita estudante sira sai formadór ba programa sira ne’ebé hetan apoiu husi ANZ.

“Agora ami sei servisu hamutuk ho ANZ durante tinan rua (2) hodi fasilita fali formasaun ba estudante sira seluk inklui estudante sira husi universidade seluk. Ami mós fasilita ona formasaun ne’e ba estudante finalista sira ne’ebé representa husi fakuldade sanulu (10) iha UNTL nomós fasilita ona formasaun ne’e ba estudante DIT sira”, Dehan Formadora.

Partisipante husi FECT, Domingos Júlio Afonso hatete, formasaun Programa Money Minded ne’e fasilita tebes estudante sira aprende oinsa atu bele jere rasik sira-nia rendimentu ho di’ak.

“Ha’u agradese ba UNTL no ANZ ne’ebé servisu hamutuk hodi fasilita formasaun ne’e mai ami, hanorin tebes ami kona-ba jere rasik rendimentu ne’ebé iha, nomós tulun ami atu iha ábitu ba halo poupansa ba ami-nia rendimentu no aprende mós oinsa halo planeamentu ba futuru hodi garante rendimentu seguru”, Dehan Domingos.