Universidade Nacional Timor Lorosa'e (UNTL), nia Magnífiku Reitór Profesór Dr. Joviano António da Costa, M.Eng. hamutuk ho dosente no funsionáriu sira, hala'o peregrinasaun ba Santuáriu Nacional de Nossa Senhora Aitara-Soibada.

Reitór hateten, atividade peregrinasaun ne'e hanesan, atividade relijiozu hodi halo sakrifísiu.

"Tinan ne'e ita halo peregrinasaun mai iha na'in Feto Aitara, atu agradese liuhusi grasa no tulun ne'ebé Maromak haraik mai ita durante iha moris tomak. Nune'e ita bele hala'o atividade loron-loron ho di'ak", Dehan Reitór iha Igreja Parókia Soibada, Manatuto (17/10).

Reitór mós husu ba ba dosente no funsionáriu sira, atu partisipa másimu, iha atividade relijiozu sira, nune'e bele hametin liután fé.

Iha fatin hanesan, Provedor do Estudante, Pe. Nívio Correia Lebre, Fdcc, dehan, peregrinasaun ne'e momentu espiritual atu renova fila-fali, peregrinu sira-nia fiar liuliu ba dosente no funsionáriu.

"Peregrinasaun ne'e, atu renova fali ita-nia espiritual no sai mós momentu atu halo reflesaun no momentu hakmatek, atu ita bele koko relasaun ho Maromak.

Espera liuhusi peregrinasaun ne'e, bele sai hanesan momentu ida ne'ebé bele haburas no hakbiit ita-nia fiar", Tenik Pe. Nivio.

Partisipa husi, Dosente, Funsionáriu UNTL nian, Frater, Madre no Sarani sira husi Soibada.