Universidade Nacional Timor Lorosa’e (UNTL) nia Magnífiku Reitór Profesór Dr. Joviano António da Costa, M.Eng. ho Embaixadór Repúblika Korea iha Timor-Leste nian Mr. Chang Hayeon, asina nota kooperasaun, iha Videokonferénsia, Díli (30/7).

Iha diskursu Reitór hatete, selebra akordu ne’e atu fahe komitmentu no haforsa Kooperasaun akadémiku nian iha peskiza, troka kultura no promosaun lian Korea.

“Memorandu ne’e UNTL sei integra ba programa sira ne’ebé iha relasaun ho akadémiku nian, peskiza no dezenvolve edukasaun UNTL, espera kooperasaun ne’e sei lori fundasaun sólidu, dezenvolve prátika no benefísiu hamutuk”, dehan Reitór.

Embaixadór Repúblika Korea nian, Mr. Chang Hayeon agradese ba UNTL, tanba ho akordu ne’e bele hametin kooperasaun iha akadémiku no troka kultura, promosaun lian Korea, estudu Korea, peskiza, no konferénsia internasional sira.

“Agradese tebes ba UNTL bele selebra akordu ne’e ho Embaixada, ita-nia kooperasaun ne’e sei haree liu ba atividade akadémiku sira, liuliu peskiza, promosaun Lian Korea, troka kultura no kapasitasaun, simpoziu akadémiku, no konferénsia internasional sira” dehan Embaxadór.

Partisipa husi Proreitór ba Asuntu Kooperasaun nian, Profesór Cristovão dos Reis, Visedekana ba Asuntu Akadémika husi Faculdade de Turismo Artes Indústrias Criativas e Culturais (FTAICC) nian, Profesora Cecilia Gomes Corte-Real no Vise Dekana ba Asuntu Finansas FTAICC nian, Profesora Jesuina Mendonça, Diretora dos Centro de Estudos de Culturas e Arte nian, Profesora Celina Maria Godinho, Coordenador Centro Lingua Korea nian iha UNTL Sr. José Viegas no ekipa husi Embaixada Korea iha Timor-Leste.