Universidade Nacional Timor Lorosa'e (UNTL) liuhusi nia Centro de Direitos Humanos (CDH) realiza workshop ho parseiru sira kona-ba revitalizasaun programa CDH, iha salaun João Paulo II Comoro, Díli (24/07).

Diretór CDH Profesór Dr. Armindo Maia, iha nia diskursu hatete, workshop ne'e realiza oinsá atu hametin liutan ezisténsia sentru nian iha universidade no ba públiku.

"Objetivu husi workshop ne'e mak oinsá atu revitaliza no hametin liutan ezisténsia sentru nian, nu'udar unidade akadémika iha UNTL, atu bele hala'o nia knaar direitu umanu no demokratizasaun liuhusi edukasaun, formasaun, peskiza no estensaun tuor nia vizaun no misaun", dehan Diretór Maia.

Iha fatin hanesan reprezentante Vise-Reitór ba Asuntu Akadémiku atuál Diretora Transversais Profesora Dra. Cipriana Santa Brites Dias hatete, husi parte akadémiku haree ida-ne'e fundamental tebes atu bele dezenvolve knaar ho impaktu diretamente ba sosiedade akadémika.

"Global Campus Human Right iha UNTL atu haree liuba direitu umanu no demokrasia liuhusi edukasaun no peskiza, inisiativa ida ne'e rekoñese husi akademia, sosiedade sivíl ho nia organizasaun, ita halo revitalizasaun iha ambitu atu lori universidade ne'e transforma direitu umanu ba ita nia universitariu sosiedade atu haree saida mak sira nia direitu", dehan Profesora Cipriana.

Workshop ne'e konvida mós oradór sira husi parseiru sira hanesan PDHJ, CNC, UN-Human Right no partisipa masimu husi dosente peskizador sira.