Universidade Nacional Timor Lorosa’e (UNTL), nia Gabinete Vise-Reitoria ba Asuntu Estudantís (GVRAE), servisu hamutuk ho UNDP (United Nations Development Program) fasilita formasaun dezenvolvimentu kareira ba finalista husi Faculdade de Ciências Sociais e Políticas (FCSP) no Faculdade de Ciências Exatas e Naturais (FCEN), iha salaun enkontru FCEN, Balide, Díli (13/07).

Programa kontinua husi atividade ne’ebé antes ne’e hala’o ona ba estudante sira husi Faculdade de Educação, Artes e Humanidades (FEAH) no Faculdade de Economia e Gestão (FEG) iha fulan kotuk. Inisiativa ida-ne’e iha objetivu atu prepara estudante finalista sira hodi asesu ba kampu servisu, oportunidade bolsu estudu no oportunidade seluk tan bainhira remata ona sira-nia estudu iha UNTL.

Partisipa iha atividade ne’e Vise-Reitora ba Asuntu Estudantís, Profesora Bia Ble Hitu Carvalho de Jesus, hamutuk ho nia estrutura sira, jestór projetu husi UNDP, Sr. Hunjai Lee, no fasilitadór sira ho partisipante hamutuk na’in 30.

Liuhusi parseria entre UNTL no UNDP, programa formasaun ne’e hodi hasa’e kapasidade no koñesimentu estudante sira atu prepara an di’ak liután ba mundu profisionál no kontinua sira-nia dezenvolvimentu akadémiku iha futuru.