Universidade Nacional Timor Lorosa’e (UNTL) nia Magnífiku Reitór Prof. Joviano António da Costa, M. Eng hamutuk Tsuneishi Timor Shipbuilding (TTS) atribui bolsa estudu ba estudante na'in ruanulu (20) husi Faculdade de Engenharia e Ciência Tecnologia (FECT), iha Auditóriu Hera, Díli (10/09).

Reitór enkoraja estudante sira atu valoriza oportunidade ne’ebé idaidak hetan liuhusi kompromisu no dedikasaun iha sira-nia estudu, hodi bele kontribui ba dezenvolvimentu no futuru Timor-Leste.

“Hato’o parabéns ba imi-nia família no dosente sira, ne’ebé durante ne’e fó apoiu no enkorajamentu. Ha’u hein katak Programa Bolsa Estudu Tsuneishi sei kontinua nafatin, no parseria entre UNTL no Tsuneishi sei nafatin dezenvolve no kria oportunidade foun ba estudante no graduadu sira”, dehan Reitór.

Embaixadór Japaun iha Timor-Leste Sr. Yamamoto Yasushi, hatete katak parseria Tsuneishi ho UNTL sei kontinua dezenvolve no sai forte liután.

“Ba estudante sira hotu ne’ebé simu bolsa estudu ne’e. Ha’u enkoraja imi atu uza oportunidade ida-ne’e ho di’ak. Estuda makaas, dezenvolve imi-nia kapasidade profisionál, no uza koñesimentu ne’ebé imi hetan atu fó benefísiu ba komunidade no nasaun”, hato'o Embaixadór Yamamoto.

Reprezentante Bolseiru, Mariano Rendy Dias Freitas husi Departamento de Engenharia Civil, hato’o agradesimentu ba família, Tsuneishi, UNTL, profesór, dosente no ema hotu ne’ebé durante ne’e fó apoiu.

“Ami agradese tebes ba konfiansa no apoiu ne’ebé imi fó mai ami. Ami promete atu aproveita ho di’ak oportunidade ida-ne’e no halo ami-nia parte hodi hatán ba konfiansa ne’ebé fó mai ami”, hatete.

Partisipa husi Prezidente Tsuneishi Timor Shipbuilding Sr. Takahiro Kubo ho ekipa, JICA, Vice-Reitór, Pro-Reitór, Dekanu, Vise-dekanu, Diretór, estudante no família sira.