Universidade Nacional Timor Lorosa'e (UNTL) nia reprezentante reitór no atuál Proreitór ba Asuntu Garantia Kualidade (PRPAGQ), Profesór Ruben Jerónimo Freitas, Ph. D, hateten lansamentu livru rezultadu Konferénsia Timor-Leste Studies Association (TLSA) 2025 reprezenta rezultadu husi koperasaun entre UNTL ho parseiru nasionál no internasionál.

"Lansamentu livru ne'e hatudu rezultadu husi kooperasaun entre UNTL ho parseiru nasionál no internasionál. Livru ida-ne'e sei sai referénsia importante ba peskiza no dezenvolvimentu Timor-Leste nian.

UNTL sei kontinua hametin kapasidade peskizadór sira hodi aumenta publikasaun sientífika no dezenvolve kareira akadémika”, dehan PRPAGQ Freitas iha Auditóriu Faculdade de Economia e Gestão, Díli (17/07)

Koordenadór Timor-Leste Studies Association (TLSA), Michael Leach, hateten katak koperasaun entre TLSA no UNTL durante ne'e fó kontribuisaun boot ba dezenvolvimentu peskiza kona-ba Timor-Leste.

"Kooperasaun entre TLSA no UNTL kontinua hametin parseria akadémika no fó oportunidade ba peskizadór sira atu publika no aprezenta sira-nia rezultadu peskiza iha nível internasionál, hodi hasa'e koñesimentu kona-ba Timor-Leste", dehan Koordenadór TLSA Leach.

Aleinde ne’e Pontu Fokál TLSA, Profesór Apolinário Magno, esplika katak livru ne'e kompostu husi artigu sientífiku no rezultadu peskiza ne'ebé halo husi peskizadór timoroan no internasionál kona-ba Timor-Leste.

"Livru rezultadu Konferénsia TLSA 2025 kompostu husi artigu sientífiku no rezultadu peskiza husi peskizadór timoroan no internasionál. Publikasaun ida-ne'e importante atu dissemina koñesimentu sientífiku kona-ba Timor-Leste no sai referénsia ba komunidade akadémika no sosiedade", dehan Profesór Apolinário.

Partisipa husi Pro-Reitor para os Assuntos de Receitas, Professor Eng. Mário Marques Cabral, M.Eng., Dekanu Faculdade de Economia e Gestão (FEG), Profesór Filipe Mendes Pereira, estrutura TLSA nian, dosente sira, parseiru nasional no internasionál, no konvidadu sira.