Universidade Nacional Timor Lorosa’e (UNTL) nia Magnífiku Reitór Profesór Dr. Joviano António da Costa M. Eng asina akordu ho SHARE (Services for the Health in Asian and African Region) husi Japan hodi koopera iha área Saúde ba labarik sira iha Timor-Leste ne’ebé sei implementa liuhusi Projetu Esperansa.

Iha diskursu Reitór hatete, kooperasaun ne’e reflete ba valór dezenvolvimentu Timor-Leste nian, tanba husi atividade kapasitasaun no dezenvolvimentu ba peskiza edukasaun liuhusi projetu ne’e mak sei haforsa kualidade profesór sira iha futuru.

“Ohin ita selebra akordu ne’e hanesan estratéjia hodi fó prioridade ba hasa’e kualidade profesór sira nian, tanba liuhusi kualidade koñesimentu mak fó impaktu direta ba eskola sira.
Espera katak husi kooperasaun ne’e sei haforsa ensinu no aprendizajen instituisaun nian liuliu Departamento de Formação Profesores e Ensino Básico (DFPEB) iha Faculdade de Educação e Humanidades (FEH)”, dehan Reitór iha Videokonferénsia, Díli (3/07).

Reprezentante husi SHARE nian, Shutaro Shunai agradese ba universidade realiza ona akordu ne’e, tanba sei hametin kooperasaun ho UNTL nia FEH liuhusi DFPEB nian hodi hanorin estudante sira atu kuidadu saúde, tanba saúde bele hahú husi uma nomós eskola.

“Agradese tebes ba akordu ida-ne’e, ami sente hanesan previléjiu, tanba ita bele servisu hamutuk hodi kombate moras sira ba labarik, liuhusi profesór sira-nia hanorin iha eskola no sira mós bele hanorin labarik sira hadook an husi moras oioin”, dehan.

Kooperasaun ne’e hetan apoiu husi Embaixada Japan iha Timor-Leste, Fundasaun Nippon husi Japan iha Timor-Leste. Enkuantu implementasaun tékniku husi DFPEB.

Partisipa iha akordu ne’e, Visereitora ba Asuntu Estudantís nian, Profesora Bia Ble Hitu Carvalho de Jesus, Proreitór ba Asuntu Kooperasaun nian, Profesór Cristovão dos Reis, Dekanu FEH nian, Profesór Teodoro Soares, estrutura DFPEB nian, Dosente no konvidadu sira.