Universidade Nacional Timor Lorosa’e (UNTL) nia Magnífiku Reitór Profesór Dr. Joviano António da Costa, M.Eng akompaña husi reprezentante Comição da Função Pública, Comisario Jorge Paiva Araújo no Reprezentante Ministro Ensino Superior Ciência é Cultura (MESCC) Diretór Geral do Ensino Superior Sr. Higinio Alves fó posse ba Dekanu ho estrutura husi fakuldade haat ho mandatu 2026-2031.
Magnífiku Reitór hato’o agradese ba dekanu ho estrutura sira ne’ebé remata ona sira-nia mandatu, tanba halo ona kontribuisaun no dedikasaun iha fakuldade no parabens ba dekanu foun sira ho estrutura ne’ebé hetan konfiansa atu lidera fakuldade.
“Ha’u hakarak enfatiza ba dekanu ho estrutura foun sira katak lidera ho transparensia, responsabilidade, konta ho partisipasaun no servisu hamutuk, tanba susesu fakuldade depende ba kooperasaun estrutura nian.
Ha’u mós husu ba dekanu ho estrutura foun sira lidera rona malu, valoriza ideia hotu-hotu, foti desizaun ho justisa, tau interese universidade no nasaun makaas liu”, Dehan Reitór iha Auditóriu FECT, Hera (31/07).
Iha fatin hanesan Reprezenta MESCC atuál Diretór Geral Ensino Superior Sr. Higinio Alves hatete, tomada de posse ne’e ba dekanu sira sai hanesan ekipa atu hala’o servisu ho adekuadu.
“Ita estrutura foun hetan konfiansa ne’ebé iha sai responsabilidade atu atende ba estudante sira no halo dezenvolvimentu ba ita-nia rai no kabe ba pilar tolu Ensinu Superior hodi fornese produtu sira ba kampu traballu”, Dehan.
Enkuantu Emposada Alexandrinha nu’udar Vise-dekana Asuntu Akadémiku husi FCEN, sente orgullu tebes tanba universidade bele fó konfiasa mós ba feto hodi envolve aan iha estrutura fakuldade nian.
“Konfiansa ne’ebé mak ha’u hetan sei servisu hamutuk ho Universidade no fakuldade hodi dezenvolve no kontribui ba susesu estudante sira nian no mós agora iha era dijitalizasaun ami sei hakaas aan atu uza sistema dijitalizasaun ho di’ak, tanba fasilita tebes ita nia servisu hodi halo kontrolu no haree informasaun sira kona-ba unidade kurrikulár no notas ba estudante sira”, Dehan.
Dekanu sira ne'ebé simu posse ba mandatu tinan lima mak hanesan, Faculdade de Agricultura (FAGRI) Profesór Graciano Soares Gomes, Ph.D, Dekanu Faculdade de Engenharia Ciência e Tegnologia (FECT) Prof. Adlafredo Guterres da Silva Ximenes, M.Eng, Faculdade de Filosofia é Ciências Humanas (FFCH) Profesór Faustino Soares, M.Hist, Faculdade de Ciências Exatas é Naturais (FCEN) Profesór Rosito Quintão. Kada dekanu aprezenta mós estrutura visedekanu sira.
Partisipa husi estrutura universidade nian Dekanu, Vise-dekanu, Dosente, Funsionáriu, Estudante no konvidadu sira.
