Universidade Nacional Timor Lorosa'e (UNTL) nia Magnífiku Reitór, Profesór Dr. Joviano António da Costa, M.Eng, hateten katak progresu universidade presiza kontribuisaun husi funsionáriu no dosente sira, tanba ne’e presiza servisu ho sinseridade, disiplina, étika profesional no responsabilidade hodi asegura servisu ho kualidade.

“Ha’u hakarak husu ba funsionáriu hotu atu kontinua servisu ho sinseridade, dedikasaun no responsabilidade. Servisu ida-idak ne'ebé ita halo sei sai kontribuisaun boot ida atu habelar progresu universidade no hametin fiar komunidade ba UNTL,” hateten Reitór bainhira prezide serimónia isar bandeira ba fulan Agostu tinan 2026 nian, iha Kampus Sentral UNTL, Díli (03/08).

Reitór apela ba dekanu, estrutura senadu foun, estudante no lideransa akadémika hodi kria ambiente aprendizajen ne'ebé saudável, promove estabilidade institusionál no hasa'e prestíjiu universidade.

“Estudante sira mak futuru UNTL no futuru nasaun. Ha’u hein atu estudante sira bele koopera di'ak ho Dekanu no Senadu foun, respeita regulamentu akadémiku no hamutuk lori naran di'ak universidade nian ba nível nasionál no internasionál”, dehan Reitór.

Serimónia isar bandeira ne'e responsabilidade husi Faculdade de Medicina e Ciências da Saúde (FMCS). Partisipa husi Visereitór sira, Proreitór, Diretór-Jerál, Diretór Nasionál sira, Dekanu fakuldade sira, Xefe Departamentu sira, funsionáriu no estudante sira.