Universidade Nacional Timor Lorosa'e (UNTL) nia Magnífiku Reitór, Profesór Dr. Joviano António da Costa, M. Eng, prezide serimónia isar-bandeira ba fulan Jullu, ne'ebé realiza iha Kampus Sentrál UNTL, Díli (06/07).

Iha diskursu Reitór hato'o agradesimentu ba Komisaun Organizadora Graduação ba dala XXXIV ne'ebé realiza ona iha semana kotuk, tanba sira-nia dedikasaun no responsabilidade hodi garante serimónia ne'e la'o ho susesu.

“Ha’u hakarak hato'o ha’u-nia agradesimentu boot ba komisaun organizadora hotu ne'ebé servisu ho dedikasaun no responsabilidade hodi prepara no realiza serimónia graduação ba dala XXXIV. Maski iha dezafiu oioin. Ita hotu hatudu espíritu servisu hamutuk, kooperasaun no kompromisu atu garante serimónia ne'e lao ho susesu”, dehan Reitór.

Reitór mos enkoraja dosente, funsionáriu no estudante sira atu nafatin hametin unidade no kolaborasaun hodi promove UNTL nia naran di'ak no kontribui ba dezenvolvimentu universidade nian.

“Ha’u bolu dosente, funsionáriu no estudante sira hotu atu kontinua koopera malu, respeita malu no servisu hamutuk. Bainhira ita iha unidade no kolaborasaun ne'ebé metin, ita bele promove UNTL nia naran di'ak iha nível nasionál no internasionál, no hametin universidade ida-ne'e atu sai instituisaun edukasaun superior ne'ebé iha kualidade”, hateten Reitór.

Serimónia Isar-Bandeira ne'e organiza husi estudante husi Faculdade de Ciências Exatas e Naturais (FCEN) no Faculdade de Filosofia Ciências Humanas (FFCH).

Partisipa husi Visereitór sira, Proreitór sira, Diretór Jerál, Diretór Nasionál sira, Xefe Departamentu, Dekanu no Visedekanu sira, dosente, funsionáriu no estudante sira.