Universidade Nacional Timor Lorosa’e (UNTL) nia Magnífiku Reitór, Prof. Dr. Joviano António da Costa, M.Eng., hateten katak dosente no funsionáriu sira iha responsabilidade importante iha prosesu dezenvolvimentu iha universidade.

“Ha’u husu ba ita hotu, liuliu dosente no funsionáriu sira, atu servisu ho profisionalismu, responsabilidade no dedikasaun, liuliu iha apoiu ba prosesu akadémiku no administrativu, bem-estar estudante sira no prestasaun servisu iha universidade", dehan Reitór liuhusi serimónia Isár Bandeira iha fulan outubru 2026 iha Kampus Sentral, Díli (06/10).

Reitór mós husu ba estudante sira atu kontinua iha kooperasaun di’ak ho dosente, funsionáriu, estrutura fakuldade no universidade.

“Ba estudante sira, ha’u husu atu koopera ho dosente, funsionáriu, estrutura fakuldade no universidade, hodi hametin unidade no kontribui hamutuk ba hadi’a naran di’ak UNTL no hametin relasaun no kria ambiente akadémiku ne’ebé di’ak”, Tenik.

Reitór enfatiza katak dezenvolvimentu UNTL la’ós responsabilidade ema ida de’it, maibé presiza partisipasaun no kooperasaun husi komunidade akadémika hotu.

Atividade ba fulan outobru nian ne’e responsável ba Korpu-Isar Bandeira no Koru husi Faculdade de Direito (FADIR) no Faculdade de Turismo, Artes, Indústrias Criativas e Culturais (FTAICC).

Partisipa husi Visereitór, Administrador Geral, Proreitór, Diretór Jeral, Diretór Nasionál, Xefe Departamentu, Funsionáriu no Estudante.