Universidade Nacional Timor Lorosa’e (UNTL), nia Magnífiku Reitór Prof. Dr. Joviano António da Costa, M.Eng., hamutuk ho autoridade lokál Suku Nahareka, inaugura instalasaun bee moos ne’ebé instala husi estajiáriu na'in 36 husi Faculdade de Engenharia, Ciência e Tecnologia (FECT), Departamento de Engenharia Mecánica, iha Suku Nahareka, Postu-Administrativu Ossu, Munisípiu Viqueque, ( 18/08/).
Reitór hatete katak atividade estájiu la’o ho di’ak no estudante sira konsege lori bee husi bee-matan Lauwana to’o iha Suku Nahareka, tanba ne’e susesu programa refere depende ba avaliasaun husi komunidade.
“Ami la bele hatete katak ami halo di'ak maibé ita boot sira mak bele fó valór no apresiasaun, katak ami-nia estudante sira bele liga bee to’o iha ne'e. Sira mai halo estájiu ho planu fakuldade, ne'e parte ida husi sira-nia estudu, hakarak hato'o ba komunidade Suku Nahareka, ida ne’e mak kontribuisaun ami-nia estudante sira halo no rai hela ba ita iha suku Nahareka”, dehan Reitór.
Iha fatin hanesan Xefe Suku Nahareka José Martins Sequeira Lopes hatete, kontente no agradese ba universidade tanba ho sira-nia esforsu konsege instala ona bee moos ba komunidade.
“Louva nafatin estajiáriu sira-nia kapasidade no matenek ne'ebé sira aprende iha universidade depois sira mai prátika duni iha Suku Nahareka maske bee ne'e iha klean oitoan. Maibé ho sira-nia kapasidade ne'ebé iha bele distribui ona bee moos ba komunidade sira, ne'e hanesan vantajen boot ida ba suku Nahareka”, dehan Xefe Suku.
Koordenadór Estajiáriu, Serginho S. G. Correia, hatete dezafiu ne’ebé hasoru bainhira halo servisu lalin rai henek, tanba udan, maibé sira hotu iha determinasaun atu programa estájiu ne’e la’o ho susesu.
“Ami hotu hakarak programa estájiu ne’e la’o ho susesu. Ami mai ho intensaun atu ajuda komunidade sira iha Suku Nahareka. Ida-ne’e sai hanesan motivasaun ba ami, atu nune’e ami bele kontinua esforsu no servisu hamutuk hodi finaliza programa ida ne’e
Hameno hela ba komunidade s
Suku Nahareka atu kuidadu obra ida ne'ebé mak ami rai hela iha ne'e, halo ida ne'e ho domin, ami fiar katak ita boot sira sei kuidadu obra ne'e mós ho domin”, dehan.
Orsamentu ba instalasaun bee moos ne’e mai husi estudante estajiadu na’in 36, ne’ebé hala’o estajiu durante fulan ida, husi 24 Jullu to’o 18 Agostu 2026, ho totál US$7.200. Instalasaun ne’e sei benefísia komunidade uma-kain 40 resin iha Suku Nahareka.
Partisipa husi, Visereitór no Proreitór sira, Dekanu FECT Adalfredo Ximenes ho nia estrutura, lia-na’in no komunidade Suku Nahareka no estudante sira.
