Universidade Nacional Timor Lorosa’e (UNTL) nia Magnífiku Reitór, Prof. Dr. Joviano António da Costa, M.Eng., husu ba dosente no funsionáriu sira atu fó prestasaun no servisu ne’ebé di’ak, profisional no responsavel ba estudante sira iha universidade.

“Ba funsionáriu sira, apela atu fó atendimentu ne’ebé di’ak ba estudante. Enkuantu ba dosente sira, hatudu ita-nia responsabilidade no hala’o knaar hanorin ho di’ak, onestidade no profisionalizmu.

Halo ita-nia servisu ho dedikasaun no kompromisiu, tuir ita-nia vokasaun hanesan edukadór,” dehan Reitór UNTL iha serimónia isar-bandeira, iha inísiu semana dahuluk fulan Setembru, iha Kampus FEG-UNTL, Díli (07/09).

Responsável ba koru no korpu-isar-bandeira husi Faculdade de Economia e Gestão (FEG). Partisipa husi Visereitór, Proreitór, Administradór Jerál, Diretór Jerál, Diretór Nacionál, Dekanu, Dosente, Xefe Departamento, funsionáriu no estudante sira.