Reitór hala’o abertura I Semináriu …

Reitór hala’o abertura I Semináriu Interdisiplinar

𝐔𝐍𝐓𝐋–𝐑𝐄𝐈𝐓Ó𝐑 𝐇𝐀𝐋𝐀'𝐎 𝐀𝐁𝐄𝐑𝐓𝐔𝐑𝐀 𝐈' 𝐒𝐄𝐌𝐈𝐍Á𝐑𝐈𝐔 𝐈𝐍𝐓𝐄𝐑𝐃𝐈𝐒𝐈𝐏𝐋𝐈𝐍𝐀𝐑 - 1

Universidade Nacional Timor Lorosa’e (UNTL), nia Magnífiku Reitór Prof. Dr. Joviano António da Costa, M.Eng., ofisialmente hala’o abertura “I Seminário Interdisciplinar do Programa de Pós-Graduação e Pesquisa”, organiza husi Gabinete Vice-Reitoria para Assuntos de Pós-Graduação e Pesquisa (PPGP) durante Loron rua, iha Auditóriu Faculdade de Economia e Gestão (FEG), Díli (10/11).

“Universidade labele limita an de’it ba transmisaun koñesimentu, maibé tenke produz peskiza sientífika no dezenvolve koñesimentu atu fó benefísiu ba sosiedade.

Estratéjia ensinu pós-graduasaun ba formasaun rekursu umanu kualifikadu, hametin peskiza sientífika no promove kolaborasaun interdisiplinár iha área enerjia, infraestrutura, saúde, edukasaun, polítika públika, kultura no dezenvolvimentu komunidade”, dehan Reitór.

Reitór hameno ba peskizadór no estudante pós-graduasaun sira atu kontinua hala’o peskiza ho rigor, kriatividade no responsabilidade, hodi kontribui ba komprensaun kle’an liután kona-ba realidade no buka solusaun ba dezafiu sira ne’ebé sosiedade enfrenta.

Vice-Reitor Para os Assuntos de Pós-graduação e Pesquisa Professor Vicente de Paulo Correia afirma katak, atividade akadémika ne’e importante tebes hodi fó oportunidade ba estudante finalista sira atu aprezenta no fahe sira-nia rezultadu peskiza, la’ós rai de’it nu’udar obra akadémika.

“Tópiku peskiza sira ne’ebé aprezenta iha atividade ne’e iha relevánsia boot ba dezenvolvimentu nasaun, liuliu iha área sira ne’ebé aborda. Tanba ne’e, konvida mós ministériu no diresaun relevante sira atu partisipa no fahe sira-nia hanoin, nu’udar esforsu ida atu divulga no hametin atividade Pós-Graduasaun”, dehan Profesór Correia.

Partisipa husi Vice-Reitór, Pró-Reitór, Dekanu, Diretór, Koordenadór, dosente, peskizadór, estudante no konvidadu sira.