Universidade Nacional Timor Lorosa’e (UNTL) nia Magnífiku Reitór Profesór Dr. Joviano António da Costa, M.Eng hatete, graduasaun marka siklu enseramentu iha perkursu akadémiku estudante nian iha universidade hodi konstitui etapa foun ho responsabilidade no oportunidade.

“Diploma ne’ebé ohin fó atu sertifika koñesementu durante tinan barak imi aprende iha universidade. Ida-ne’e define imi-nia perkursu hodi utiliza koñesementu ba aplika no mellora imi-nia moris, fortalese ba instituisaun hodi kontribui ba dezenvolvimentu iha país”, Dehan Magnífiku Reitór iha graduasaun solene ba dala XXXIV ho tema “Graduados Qualificados, Responsáveis e Éticos na Era da Transformação Digital” ba loron daruak iha sesaun dader nian iha Centro Convenções de Díli (29/06).

Reprezentante Ministro do Ensino Superior Ciência e Cultura (MESCC) nia Xefe Gabineti, Sr. José Boavida, felisita ba komunidade akadémika hotu ho dedikasaun hodi forma graduadu kualifikadu ne’ebé termina ona sira-nia estudu iha universidade.

“Diploma ida-ne’e reprezenta konfiansa ba família no sosiedade, tanba ne’e ohin ita selebra hamutuk imi-nia susesu, tanba edukasaun kualifikadu mak hanesan riin ba dezenvolvimentu iha ita-nia nasaun”, dehan Reprezentante MESCC.

Graduasaun sesaun dader loron daruak nian mudansa fita no distribui diploma ba Faculdade de Ciências Sociais e Políticas (158), Faculdade de Economia e Gestão (135), Faculdade de Direito (41), Faculdade de Turismo Artes Indústrias Criativas e Culturais (22) no Faculdade de Filosofia e Ciência Humanas.

Partisipa husi membru governu, korpu diplomátiku sira, estrutura UNTL no fakuldade nian, dosente, inan-aman, parseiru dezenvolvimentu no konvidadu sira.