Universidade Nacional Timor Lorosa'e (UNTL), Faculdade de Medicina e Ciência da Saúde (FMCS) nia Profesór Dr. Joaquim Pinto hatete, atu sai profisional saúde ne'ebé di'ak presiza hatudu étika no integridade nu'udar baze fundasaun no presiza servisu hamutuk ho ema seluk.

"UNTL la forma de'it graduadu iha matenek akadémiku, maibé ho fuan no karáter sira, tenke kontinua aprende tanba siénsia saúde muda lalais, mantén étika no integridade nu'udar fundasaun, atende pasiente hotu ho dignidade, empatia no respeitu, servisu hamutuk entre enfermagem, parteira no medisina. Uza média sosiál ho aplikasaun simples atu fahe informasaun loloos ba komunidade tomak", Dehan Profesór Joaquim liuhusi Oratio Sapientia iha graduasaun ba XXXIV, iha CCD, Dili (25/06).

Aleinde ne’e, Graduada Aguida Arcanjo da Costa L. Far, hatete responsabilidade graduadu sira-nian iha mundu dijitalizasaun mak tenke uza teknolojia hodi mellora kualidade servisu saúde nian.

"Ita agora moris iha era dijitalizasaun. Nu'udar lisensiada foun iha Departamentu Farmásia no profesionál farmaséutiku, ha'u sei utiliza média dijitál sira ne'ebé iha hodi fahe informasaun ba komunidade no pasiente sira, atu nune'e sira bele asesu ba informasaun saúde nian ho klaru liután", dehan Aguida.

Iha sesaun ne’e Profesór Joaquim aprezenta Oratio Sapientia ho tema "Graduadu Sira Ne'ebé Kualifikadu, Responsável no Étiku iha Era Transformasaun Dijitál Hodi Kontribui ba Redusaun Taxa Mortalidade Labarik Menus Husi Tinan Lima Mai Kraik".