Universidade Nacional Timor Lorosa’e (UNTL), liuhusi Pro-Reitoria ba Asuntu Informatizasaun, Transformasaun Dijital no Inovasaun (PRAITDI), nia Direção Nacional Informática e Tecnologia (DNIT), hala’o formasaun kona-ba utilizasaun Sistema Informasaun Akadémika (SIA) ba dosente no funsionáriu sira Faculdade de Ciências Sociais e Políticas (FCSP) nian, iha Kampus Caicoli, Díli.

Formasaun ne’e realiza durante loron lima, husi loron 6 to’o 10 Jullu 2026, iha Auditóriu FCSP, ho objetivu prinsipal atu hasa’e koñesimentu no abilidade dosente, estrutura fakuldade no funsionáriu sira iha utilizasaun Sistema SIA.

Programa formasaun ida-ne’e hodi fasilita servisu administrasaun akadémika atu sai efisiente, organizadu, transparente no profisionál liután, nune’e mos atu apoia prosesu transformasaun dijital iha UNTL.

Sistema SIA nia funsaun atu dijitaliza servisu administrasaun akadémika sira, liuliu prosesu prensimentu Fixa Planifikasaun Estudu (FPE) online husi estudante sira. Sistema ne’e mos fasilita dosente sira atu prense no submete nota diretamente iha plataforma, no permite estudante sira asesu informasaun kona-ba rezultadu estudu iha fatin ne’ebé de’it, inklui asesu ba transkrisaun nota.

Implementasaun Sistema SIA iha FCSP sei hahú iha semestre par tinan ida-ne’e, ho apoiu no asisténsia téknika husi ekipa PRAITDI no DNIT.