Universidade Nacional Timor Lorosa’e (UNTL), nia Magnífiku Reitór Prof. Dr. Joviano António da Costa, M. Eng ho Vise-Primeiru-Ministru (VPM) no Ministru Ensinu Superior Siénsia no Kultura (MESCC) Interinu Eng. Mariano Assanami Sabino ofisialmente lansa Departamento de Psicologia no Departamento de História.
“UNTL mak universidade ne’ebé valoriza koñesimentu sientífiku, promove hanoin krítiku no rekoñese katak formasaun ensinu superiór tenke kontribui ba dezenvolvimentu profisionál no formasaun umana.
Dezenvolvimentu área Istória no Psikolojia tenke lori oportunidade foun ba formasaun espezializada no peskiza, ne’ebé sustenta planeamentu, hadi’a kualifikasaun dosente sira no dezenvolve programa kurrikulár adekuadu ba nesesidade TL nian”, Dehan Reitór iha ámbitu selebrasaun aniversáriu Faculdade de Filosofia e Ciências Humanas (FFCH) ba dala-XI iha Salaun Ian Martin, Balide-Díli (15/10).
MESCC Interinu Eng. Mariano Assanami Sabino hatete, reprezenta Governu hakarak felisita ba FFCH ne'ebé kria tan kursu rua Psikolojia no Istória hodi kompleta liu tan UNTL nia misaun.
“Governu fó apoiu tomak atu hadi’a kualidade ensinu no hametin integrasaun ho ASEAN. Istória importante la’ós de’it atu lee, maibé atu komprende ita-nia orijen, orienta dalan ba futuru no forma karakter. Iha era teknolojia, estudante sira tenke koñese istória, hamriik metin ho identidade no konfiansa an, no inspira husi erói sira atu hasoru dezafiu no avansa ba oin,” dehan Nia.
Dekanu FFCH Profesór Faustino Soares hatete, kursu rua ne’e reprezenta konkista importante ba fakuldade, nomós oportunidade foun ba joven Timoroan sira ba dezenvolvimentu nasaun nian.
“Períodu naruk, FFCH dezenvolve atividade akadémika liuhusi kursu Filosofia, hodi kontribui ba formasaun estudante sira iha kapasidade atu reflete ho kritériu, halo análize étika no komprende problema umanu no sosiál.
Ohin, ita habelar oferta formativa ba área Istória no Psikolojia. Ida-ne’e marka pasu desizivu ida atu hametin prezensa siénsia umana iha ensinu superiór iha Timor-Leste”, Dehan Dekanu.
Partisipa husi Diretora Eskritóriu Rejionál UNESCO iha Jakarta, Sra. Maki Katsuno-Hayashikawa ho reprezentante sira iha TL, Vice-Reitór, Pró-Reitór, Dekanu, reprezentante husi instituisaun parseira, konvidadu nasionál no internasionál, dosente, peskizadór, funsionáriu no estudante sira.
