Universidade Nacional Timor Lorosa'e (UNTL) serbisu hamutuk ho Ministério de Ensino Superior, Ciência e Cultura (MESCC), no Instituto Politécnico de Timor-Leste (IPTL), halo diseminasaun kona-ba “Asesu ba Ensinu Superiór Públiku”, tinan akadémiku 2027.

Diretór Jerál Administrasaun Akadémika (DGAA), Sr. Armindo Leto Fátima hatete, diseminasaun ne'e hala'o iha territóriu tomak, kona-ba prosesu ingresu ba ensinu superior públiku tantu UNTL no IPTL.

"Diseminasaun ne'e ita halo ba territóriu laran tomak, espera katak ita-nia partisipante sira husi autoridade lokál, diretór eskola, bele partilla fila-fali ba estudante sira ne'ebé dadaun ne'e atu prepara ba ezame nasional", Dehan DG iha Salaun Ministériu Edukasaun, Maliana (15/09).

Diretór Nasionál Kurríkulu husi MESSC, Alcino Barreto João hateten, eventu refere atu partilla informasaun ba autoridade sira hodi hatutan ba estudante finalista husi ensinu sekundáriu tinan 2027.

"Objetivu husi diseminasaun ne'e atu fahe informasaun ba autoridade no profesór sira. Nune’e ministériu husu atu partisipa ho seriedade, ativu nune'e Munisípiu Bobonaro ho númeru ba asesu UNTL no IPTL bele aumenta no di’ak liután", tenik Diretór Barreto.

Reprezentante PAM Bobonaro, atuál Sekretáriu Administrasaun no Finansas Sr. Domingos da Costa, dehan diseminasaun ne'e importante, atu bele fasilita estudante finalista.

"Husu ba Autoridade sira atu haree tuir regulamentu MESSK nian, no la bele halo rekrutamentu ba estudante finalista sira, atu hatudu profisional no halo selesaun di'ak ba sira", dehan.

Partisipa Reprezentante (IPTL), Elisio A. Tilman Ximenes, Autoridade Suku sira husi munisípiu nian, Diretór Eskola, Ekipa MESSC, Funsionáriu, no estudante sira.